El ciclu de cine ‘Baxando pa la Galería’ abre les IX Xornaes Culturales De Castilletes y Carbón

La Fundación Nuberu y el Conceyu de Llangréu entamen per novenu añu les Xornaes Culturales De Castilletes y Carbón, que s’articulen en dos estayes: ‘Baxando pa la Galería’, esti mes, y ‘Los xueves de Castilletes y Carbón', en payares. La película ‘Billy Elliot’ inaugura’l ciclu de cine esti miércoles nel Felgueroso.

De Castilletes y Carbón trátase d’una actividá de dinamización cultural qu’estes dos entidaes ponen en marcha como consecuencia d’un conveniu de collaboración ente dambes. En concreto, estes xornaes culturales “busquen ser un averamientu ya intentu d’interpretación de la mina y tolo que la arrodia al traviés de la música, el cine y tamién de ponencies que traten esti tema dende diferentes perspeutives y ámbitos d’estudiu”.

Tolos miércoles d’esti mes, dende güei, va proyeutase una película a les 19.30 hores nel Cine Felgueroso, siendo la primera ‘Billy Elliot’, filme británicu del añu 2000 dirixíu por Stephen Daldry y protagonizáu por Jamie Bell con una historia que se desendolca mientres la fuelga minera del 84 y 85. El restu de cintes d’esti ciclu son ‘Lobos sucios’, el día 17; ‘Los 33’, el 24; y ‘La mina del diablo’, el 31.

Yá en payares, les actividaes pasen a ser los xueves, con ‘Los xueves de Castilles y Carbón’, que programen cuatro ponencies nel Centru de Referencia de la Cultura y la Llingua Asturiana Casa de los Alberto de Ciañu a les 20 hores. La primera va ser el día 8 con ‘La gaita, tradición anovada’, a cargu de Berto Varillas, pa siguir con ‘Por qué ye necesaria la oficialidá? Drechos llingüísticos n'Asturies’, con Inaciu Galán (día 15); ‘El paisaxe de la reconversión na lliteratura asturiana’ por Marta Mori (22); y la presentación de la obra ganadora del XXIII Premiu  Máximo Fuertes Acevedo d’ensayu ‘42,553. Depués de Buchenwald’, de Xuan Santori (29).

L’actividá de De castilletes y Carbón compleméntase cola esposición ‘Mina nel mundu’, que pue visitase mientres el mes de payares na Casa los Alberti de Ciañu.