El CES ve difícil qu'Asturies pueda financiar les competencies

El Conseyu Económicu y Social d'Asturies (CES)
presentó ayeri los datos de la Memoria de Situación
Económica y Social del añu 2.002, que nun dexen
precísamente en bon llugar a la economía asturiana. Según
esta memoria, la economía asturiana espoxigó un 1,6%, cuatro
décimes menos que la media estatal y marcó'l segundu peor datu de
crecimientu del estáu tres de Baleares, una comunidá muncho
más rica que l'asturiana.



El datu del CES vien a afitar el desfase de la economía asturiana respective a
la media estatal, como demuestra'l que nel periodu 1995-2002 la economía
asturiana tuviere una xuba media anual del 2,1% contra'l 3,3% estatal.
Según los responsables del CES, Asturies precisa d'echar unosaños
con un crecimientu un puntu y mediu penriba de la media nacional pa ser quien a
concueyar cola media española y ponese nel camín de la
converxencia con Europa. Ente les causes qu'ayuden a esplicar esti porcentaxe
tan l'avieyamientu de la población, l'aumentu del gastu de farmacia, la
falta de movimientu na economía del país y les torgues que pon el
marcu llegal a la capacidá d'endeldamientu de les CCAA, en clara
referencia a la llei del déficit cero.



L'analís del CES fai gravísimes conclusiones sobre la
economía asturiana. Echándose al pie d'elles, el profesor Jesús
Arango, un de los autores del informe y que foi conseyeru con Pedro de Silva, llega a proponer que la comunidá autónoma-y devuelva al
Gobiernu central delles competencies en cuantes que nun va poder facese cargu
d'elles por falta de financiación. L'economista del CES encóntase pa dicir esto
en que, en cuantes que la financiación autonómica vien
d'impuestos cedíos y esos impuestos van venceyaos directamente al
crecimientu económicu, si la comunidá autónoma nun crez,
la recaudación mengua. El CES entiende que toles competencies
tresferíes (educación, xusticia etc) van tener problemes de
perres, pero Arango atalanta que'l problema financieru que pue tener la Sanidá
diba ser enforma grave, y anque elli defende una anidá estatal y non tresfería, ve que'l desfase de la sanidá asturiana pue ser mayor que'l de otres CCAA, sobremanera si va tener que financiar ella sola proyectos como l'hospital nuevu.

Ente les posibles igües pa que la CCAA recaude
más, el CES nun contempla l'impuestu sobre la gasolina y el gasói,
en cuantes qu'esti diba suponer un endurecimientu de la imposición
indirecta de la que vendríen efectos negativos como la xuba de la
inflación.