El Celsius 232 avilesín torna a escaecer l’asturianu na so programación

Somos Avilés ta acabante de facer públicu un dossier sobre la situación del idioma nel Festival de Terror, Fantasía y Ciencia Ficción de Avilés Celsius 232. Un añu más l’asturianu nun apaez na so programación, onde sí hai creadores en catalán, gallegu o eusquera.

“Per sestu añu consecutivu l’asturianu nun va tar presente nesti alcuentru multidisciplinar patrocináu pol Ayuntamientu d’Avilés con delles ayudes económiques y apoyu mediáticu”, recuerda la candidatura de xunidá popular, que n’agostu del 2015 yá presentara una moción pa la 'Inclusión de Cláusules pal Favorecimientu de la Presencia de la Llingua Asturiana nes Ayudes o Subvenciones Concedíes pa la Organización d’Eventos Músico-lliterario-culturales'. La reación de la conceyala de Promoción Social y Cultura, Yolanda Alonso, foi la d’acusar a Somos Avilés de querer imponer “una especie d’apartheid llingüísticu favoreciendo solamente aquellos creadores en llingua asturiana, que se beneficiarían de les ayudes públiques”.

“La cuestión agora ye quién aparta a quién”, recuerda Xune Elipe, edil de Somos Avilés. “Ye doliosu que nun eventu cola relevancia que’l Celsius 232 tien nel branu avilesín se convide a escritores con sensibilidá hacia les llingües de los sos territorios y nun haya nin un solu autor o autora con obra publicada n’asturianu, teniendo en cuenta qu’esti alcuentru tien un apoyu económicu y loxísticu bultable por parte del Ayuntamientu”, recueye’l dossier, que fala de la presencia de Sergi Escolano, Marc Pastor, Ricard Ruiz Garzón, Abel Amutxategi y Ledicia Costas.

Nesi sen, Somos Avilés destaca que “precisamente na lliteratura de los xéneros al que ta dedicáu, por exemplu’l fantásticu o’l xuvenil, hai mui bonos autores en llingua asturiana”, poniendo como exemplos a Vicente García Oliva, Carlos García Espina o Adolfo Camilo Díaz. “Como dicimos, ye una verdadera pena qu’un festival que nos merez tolos respetos, como ye’l Celsius 232, escaeza a la llingua asturiana y nun s’aproveche pa divulgar y visualizar, ente los asistentes al mesmu (seyan asturianos o non) la bona lliteratura fantastica y xuvenil que se crea nella. Como, por cierto, faen otros alcuentros lliterarios del mesmu tipu, casu de la Semana Negra de Xixón, dedicada a la novela negra y que cuenta siempre con dalguna representación d’escritores n’asturianu; na d’esti añu tuvieron presentes por exemplu Vanessa Gutiérrez, Xuan Bello o Xulio Arbesú”.

Respetar la independencia

Tres facer una críticia a la política llingüística d’Avilés, nel escritu apúntase que “creyemos conveniente establecer, ensin amenorgar la independencia y llibre decisión de les entidaes y asociaciones, unes cláusules o pautes que favorezan la inclusión de la llingua asturiana nes actividaes que cuenten con ayudes públiques municipales. Asina, llograríase la presencia d’artistes, autores y músicos locales y del restu d’Asturies, cola consiguiente promoción llingüística que conllevaría ensin que supunxese un costu añadíu a les arques municipales”, al empar que qu’asegura “qu’una parte del presupuestu dirixíu a estes ayudes reportaría en beneficiu del texíu cultural propiu”.

El sestu Celsius 232 va celebrase ente’l miércoles y el sábadu cola participación d’un centenar de creadores, ente los que destaques Jay Asher, Joe Hill, Rhianna Pratchett, David Grossman, Joe Abercrombie y Ann Leckie. Les actividaes van desendolcase nel entornu de la Casa Municipal de Cultura.