El 94 por cientu de los llectores d’Asturies.com nun cree compatibles los dos cargos de Javier Fernández

El ser presidente d’un país, más colos problemes d’Asturies, requier una dedicación plena. Asina lo entienden los usuarios d’Asturies.com que participaron en ‘Conceyu Abiertu’. El 94 por cientu cree que la presidencia d’Asturies nun ye compatible con presidir la xestora d’un partíu como’l PSOE.

La entruga que plantegamos a los nuesos llectores yera ‘¿Considera compatible tar al frente de la xestora del PSOE y ser presidente d'Asturies?’, a lo que’l 94 por cientu respondió ‘Non, da la sensación de que Javier Fernández va centrase más en solucionar los intereses del partíu que los problemes d'Asturies’. Mentes, un 4 por cientu escoyó la opción ‘Sí, porque son coses complementaries y ye dalgo habitual en política’.

Lo cierto ye que’l cargu qu’ocupa dende la selmana pasada’l mierense yá ta teniendo repercusiones na política asturiana, como bien informaba Asturies.com ayeri, dando la sensación de que ta dedicando más tiempu a solucionar los problemes del partíu a los d’Asturies nun momentu de negociación presupuestaria que paez que va llevar a una segunda prórroga de nun repetise la sorpresa d’un alcuerdu col PP, al igual qu’asocediera coles cuentes del 2015.

Retirada de la Virxe del Carbayu

Dende esti momentu yá ye posible participar nun ‘Conceyu Abiertu’ nuevu. Nesta ocasión queremos conocer la opinión de los nuesos llectores sobre la polémica llevantada en Llangréu pola retirada d’una imaxe de la Virxe del Carbayu na Casa Conceyu tres un alcuerdu ente Izquierda Xunida, Somos Llangréu, PSOE y Ciudadanos.