Los ‘deberes’ de Javier Fernández en Madrid yá condicionen la política asturiana

La Xunta Xeneral retrasa’l Debate sobre l’Estáu del País dos selmanes. Convocáu nun primer momentu pal día 24, la Xunta de Voceros de la Xunta Xeneral retrasóla esti llunes pal 7 de payares por pidimientu del Gobiernu. El procesu pa la posible investidura de Mariano Rajoy tamién inflúi na decisión.

La presidencia de Javier Fernández de la xestora que dirixe’l PSOE hasta celebración d’un próximu Congresu yá ta empezando a influyir na política asturiana. El Gobiernu solicitó esta mañana a la Xunta de Voceros de la Xunta Xeneral el retrasu dos selmanes del Debate sobre l’Estáu del País, una fecha que taba afitada enantes del terremotu que se vivió recién nel PSOE y que llevó a la dimisión de Pedro Sánchez y a la creación de la xestora que se confió a Javier Fernández.

El cargu nuevu del socialista recibió munches crítiques dende Asturies pola situación na que s’atopa’l país, a les puertes d’una segunda prórroga presupuestaria. Un exemplu d’ello ye esti retrasu, pasando’l Debate del 24, 25 y 27 d’esti mes al 7, 8 y 10 de payares. A esti cambiu tamién inflúi’l procesu pa la escoyeta de presidente del Gobiernu estatal, que debería finase enantes d’esti mes pa evitar unes terceres eleiciones.

Podemos foi la única fuercia foi la única fuercia que refugó esta midida impulsada tamien pol Partido Popular y que contó col sofitu, por cortersía parllamentaria, d’Izquierda Xunida, Foro y Ciudadanos. La formación morada considera “mui grave” que ponga “los intereses del so partíu perriba de los d’Asturies”, mientres que’l restu de formaciones amosaron la so disconformidá cola postura de Fernández, que tampoco nun va responder esti vienres les entrugues de la oposición.

Semeya obra d'Armando Álvarez.