El 70,26 por cientu de la población diana yá tien una dosis de la vacuna

Esti llunes rexistráronse 41 contaxos.

La campaña de vacunación sigue a velocidá de cruceru y yá raspia'l millón de dosis alministraes. Los datos últimos, con cifres d'ayeri, poníen el total en 997.595, en concreto 633.221 con polo menos una, lo que supón un 70,26 por cientu de la población diana –mayores de 16 años– y un 62,15 por cientu de la total del país.

Tienen la pauta completa 395.713 persones, un 43,91 por cientu d'a los que va dirixida la vacuna y un 38,84 por cientu de toles asturianes y asturianos. Ayeri punxéronse 16.127 dosis, el mayor númbero nun solu día dende'l 27 d'avientu, cuando entamó la campaña, y yá se ta citando a los nacíos nel 1984.

Ensin finaos

A falta de la espublización de los datos oficiales completos de la pandemia de COVID-19, ayeri la Conseyería de Salú informó de 41 casos nuevos detectaos ayeri –l'actualización suma 1 más del sábadu non contabilizao–. Son 4 menos que'l domingu, cuando s'informó de 45.

El Serviciu de Salú del Principáu d'Asturies (SESPA) fixo 2.422 pruebes de diagnósticu d'infeición activa, polo que la tasa de positividá s'asitió nel 2,56 por cientu. A 7 díes esti porcentaxe taba na xornada previa nel 2,89 por cientu –ayeri xubió al 2,92 por cientu–.

Nun hai que llamentar finaos na xornada, polo que'l total de muertos pol andanciu caltiénse en 1.977. Siguen na UCI 17 persones, mentes qu'en planta con confirmación o sospecha de COVID-19 tán 52 pacientes, 2 menos que'l día anterior.

Na imaxe, preparación d'una dosis de Janssen.