Asturies supera'l millón de dosis alministraes

Namái 11.401 persones refugaron poner la vacuna, poles 640.825 qu'optaron por protexese del coronavirus SARS-CoV-2. El martes rexistráronse 68 casos nuevos.

El Servicio de Salud del Principado (SESPA) alministró hasta ayeri 1.013.525 dosis de la vacuna. Un fitu que llega cuasi seis meses dende qu'entamó la campaña de vacunación, con 406.671 asturianes y asturianos yá con la dosis completa, un 39,92 por cientu de la población d'Asturies y un 45,12 por cientu de la mayor de la 16 años, a la que ta destinada.

12.798 personas nun recibieron la profilaxis: 11.407 por decisión propia (1,74 por cientu), mentes que pa 425 taba contraindicada y otres 975 yá teníen inmunización al pasar la enfermedá. Nestos momentos ta vacunándose a los nacíos nel tramu de 30 a 39 años.

Tercer xornada ensin finaos

A falta de la espublización de los datos oficiales de la COVID-19, la Conseyería de Salú comunicó la detección de 68 casos nuevos ayeri –l'actualización suma 1 más non contabilizáu en díes previos–. Son 27 más que'l llunes, cuando s'informó de 41.

Fixéronse 2.426 pruebes de diagnósticu d'infeición activa, polo que la tasa de positividá s'asitió nel 3,75 por cientu, superior a la de la xornada anterior, que foi del 2,56 por cientu con 2.422 tests realizaos. A 7 díes, esti porcentaxe enantes de l'actualización yera del 2,92 por cientu –ayeri xubió al 3,11 por cientu–.

Acumúlense trés xornaes ensin muertes, polo que'l total de perdes nel andanciu caltiénse en 1.977 –cola actualización súmase 1 muerte más non contabilizada previamente–. Hai 46 pacientes hospitalizaos con confirmación o sospecha de COVID-19 en planta y 16 na UCI, 6 y 1 menos que'l llunes, de manera respeutiva.

Na imaxe, la vacunación sigue n'El Molinón.