El 1 d'abril retómase la ruta ente l'Aeropuertu d'Asturies y Londres

Vueling yá tien billetes a la venta dende 29,99 euros pal trayeutu d'ida dende Santiagu'l Monte, que xube a 34,99 dende Gatwick.

Anque tenía de plazu hasta'l 30 d'ochobre pa entamar cola ruta aérea ente Asturies y Londres, l'aerollinia va principiar a trabayala'l 1 d'abril. Son cuatro frecuencies selmanales, les que tien comprometíes hasta la temporada aeronáutica de branu del 2024, cuando va aumentar a 6.

Les salíes los miércoles, vienres y domingos van ser a les 12.05, 11.35 y 11.45 hores, de manera respeutiva, dende Inglaterra, y a les 15.45, 15.10 y 15.20 dende l'aeropuertu asturianu, mentes que los llunes son a les 18.20 y a les 21.55 hores. Yá tán a la venta los billetes a un preciu a partir de los 29,99 euros pa dir hasta Gatwick, y de 34,99 pa volar a Asturies.

Tamién París

Vueling yá tenía conexón con París-Orly, con vuelos los miércoles y domingos, que nel branu del 2023 va aumentar con otra frecuencia más por mor del concursu convocáu pol Gobiernu p'aumentar les rutes internacionales dende Santiagu'l Monte. Tamién vuela a Barcelona (2 salíes diaries), Alacant, Lanzarote, Málaga, Palma de Mallorca, Sevilla y Tenerife Norte.