Educación y Cultura aumenta en 10.000 euros les ayudes a medios pa la normalización

Depués de dos años conxelaes, les ayudes a medios de comunicación pa la normalización del asturianu y gallego-asturiano viven una medra de 10.000 euros pa quedar en 100.000. Les destinaes a la edición de música caltiénense en 20.000 euros.

“La finalidá de les subvenciones a medios de comunicación ye ayudar a la normalización y dignificación del usu social de la llingua con espacios informativos onde s’usen l’asturianu o’l gallego-asturiano”, yá sían de papel o dixitales, en radio o televisión, espliquen dende la conseyería. La dotación total d’esta llinia de subvención ye de 100.000 euros, con un aumentu de 10.000 euros al respeutive del 2018, cuando se destinaron 90.000 euros.

Esta cifra venía siendo la mesma dende’l 2016, cuando tamién s’aumentaron les ayudes en 10.000 euros con respeuto al añu anterior. Sicasí, hai que tener en cuenta que nel 2013 la partida pa medios yera de 168.000 euros.

No que respeuta a la promoción de la música n’asturianu y gallego-asturiano, dirixida a empreses discográfiques col oxetivu de “aumentar la presencia de la música asturiana  na sociedá y el so pesu como elementu normalizador”, la cantidá vien siendo la mesma dende’l 2015: 20.000 euros. Entovía queden por convocar la subvención a la producción editorial, que dende’l 2015 vien siendo de 90.000 euros, y a les entidaes llocales, que l’añu pasáu recibieron 40.000 euros.

Semeya obra d'Armando Álvarez.