Educación y Cultura aumenta en 10.000 euros les ayudes a la edición n’asturianu y a entidaes llocales

|
Genaro Alonso n'Uviéu

Al igual que fixera coles subvenciones pa la normalización del asturianu y gallego-asturiano en medios de comunicación, la Conseyería d’Educación y Cultura aumenta en 10.000 euros les ayudes a la edición y a conceyos. La primera pasa a ser de 100.000 euros, mesma cifra que nel 2013, y la segunda, de 50.000.

Depués de trés años conxelaes, medra la partida de subvenciones pa la promoción del llibru n’asturianu y en gallego-asturiano. Dende’l 2015 venía siendo de 90.000 euros, añu nel que vivió una medra de 8.470 euros, yá que nel 2014 la cantidá destinada foi del 81.513,4.

Sicasí, nel 2013 ésta fora de 100.000 euros, una cantidá que se recupera seis años depués. La tirada mínima pa optar a estes ayudes ye de 300 exemplares “que pol so interés y calidá ayuden a la normalización social de la llingua y al arriquecimientu de la so cultura, faciendo posible la constitución d’un fondu bibliográficu en llingua asturiana”.

Subvenciones pa la normalización en conceyos

Les ayudes del Gobiernu a conceyos pa la normalización del asturianu y gallego-asturiano cola fin d'entamar campañes, la rotulación de les dependencies municipales, la señalización de servicios públicos, rotulación toponímica, cursos, páxines web o imaxe corporativa tamién vive un aumentu. De los 40.000 destinaos l’añu pasáu pásase a 50.000  tres un aumentu de 10.000 euros na partida.

Hai que señalar qu’esta cantidá entovía ta mui lloñe a la d’hai años atrás. Por exemplu, nel 2012 destináronse a esti aspeutu 92.400 euros, que depués d’una modificación de la resolución quedaron reducíos a 76.700.

30.000 euros más

La otra llinia d’ayudes a la normalización, la destinada a a la promoción de la música n’asturianu y gallego-asturiano, dirixida a empreses discográfiques, ye la única que nun sufre aumentu: 20.000 euros, cantidá que se repite dende’l 2015. Les de medios de comunicación algamen 100.000 euros, tres aumentar en 10.000 euros.

En total, les perres destinaes a la normalización del asturianu esti 2019 son 270.000 euros. L'aumentu ye, poro, de 30.000 euros.

Na semeya, el conseyeru Genaro Alonso la selmana pasada n'Uviéu mientres una visita Mercáu de Cooperatives y Asociaciones Educatives.

Contador Estadistiques