Educación autoriza'l grau d'Organización Industrial

|
Genaro Alonso recortada

Sigue nel aire que pueda comenzar a impartise'l cursu viniente na universidá.

Tal como avanzó Genaro Alonso'l martes, la Conseyería d'Educación y Cultura autorizó enantes del fin de la selmana, en concreto ayeri, la propuesta de la Universidá d'Uviéu pa crear el grau d'Inxeniería d'Organización Industrial. El conseyeru robló l'informe favoratible a la so incorporación a la ufierta d'estudios de la institución universitaria, trámite que permite treslladar la iniciativa al Conseyu d'Universidaes y a l'Agencia Nacional de Evaluación de la Calidad y Acreditación (ANECA) pa la verificación del plan d'estudios, pa depués proceder al preste definitivu del Conseyu de Gobiernu.

Estos pasos podríen llegar a ampliar los plazos hasta'l puntu d'impidir que'l grau nuevu pudiera impartise nel cursu viniente, tal como ye'l deséu de la Universidá d'Uviéu. Esta situación vien dada pol retrasu na autorización por parte d'Educación tres un informe de la Direición Xeneral d’Universidaes y Investigación que lu refugaba, lo qu'obligó a la institución a presentar una propuesta nueva según les esixencies de la conseyería.

Los cambios presentaos sobre la primer propuesta, torgada'l 27 d'avientu, foi una ampliación de la información sobre la xustificación detallada del númberu esperáu d'estudiantes, un estudiu d'empleabilidá pa xustificar la demanda social, l'aportación de planes docentes de la titulación ufiertada n'otres universidaes y más datos sobre la viabilidá económica y el cumplimientu de los oxetivos d'estabilidá presupuestaria.

Contador Estadistiques