Alonso avanza que l’autorización al grau d’Organización Industrial podría tramitase “esta mesma selmana”

|
 Genaro Alonso, Francisco Wenceslao López Martínez, Santiago García Granda y Elisa Miguélez inauguración Xornaes d’Orientación Universitaria 2018

“Ye inminente”, confirmó Genaro Alonso esti martes sobre la creación del grau d’Organización Industrial, demandáu dende la Escuela Politéunica d’Inxeniería de Xixón. “Esta mesma selmana” podría dase l’autorización de la conseyería d’Educación y Cultura.

“La Universidá fixo los sos deberes y unvió una información complementaria, complementando, modificando, precisando…, toos aquellos requisitos que nel nuesu informe del 27 d’avientu comunicábense-y pa la so modificación”, señaló Alonso, que’l mes pasáu yá anunciara que yera’l pasu pendiente pa la creación d’un grau que llevantó polémica pola postura de la propia conseyería, que la refugó nun primer momentu. Tanto dende los ámbitos académicos como la patronal criticaron con dureza esti posicionamientu dende Educación.

El conseyeru esplicó que “la ufierta formativa cuanto más amplia siempre meyor. Lo qu’ocurre ye q’esta ufierta formativa tien que tar adecuada a la demanda suficiente pa xustificar la puesta en práutica d’un grau”. Lo que nun pudo confirmar ye si Organización Industrial va poder ufrise pal cursu qu’entra, al tar mui xustos los plazos: ha de dir al Conseyu d’Universidaes y a l’Agencia Nacional de Evaluación de la Calidad y Acreditación (ANECA).

Alonso fixo estes declaraciones na inauguración de les Xornaes d’Orientación Universitaria 2018, onde tamién tuvo presente’l rector Santiago García Granda, que llamentó que se perdiera tanto tiempu na creación d’esti grau, dalgo que podría llevar a que la Universidá d’Uviéu nun pueda ufrilu nesti añu.

Na semeya, Alonso, l'alcalde d'Uviéu Francisco Wenceslao López Martínez, García Granda y Elisa Miguélez, vicerrectora d'Estudiantes.

Contador Estadistiques