Dos curtios n'asturianu compiten nel CINESAN

|
CINESAN

'Ad-vientu' y 'Agostu' van competir xunto con otres seis cintes na seición asturiana del I Certame Internacional de Curtiumetraxes de Samartín del Rei Aurelio (CINESAN).

La proyeición de los ocho curtios que van competir por ser la meyor creación fecha n'Asturies o en llingua asturiana va celebrase'l domingu na xornada inaugural del festival nuevu, que va allargase mientres una selmana. Asina, a les 18.30 hores va principiar la ceremonia d'apertura nel Teatru Municipal, en L'Entregu, cola presencia del direutor Samu Fuentes, pa depués dar comienzu cola seición asturiana.

La premiada internacionalmente 'Ad-vientu', dirixida pol asturianu Roberto F. Canuto y el chinu Xu Xiaoxi, y 'Agostu', de Diego Llorente, son les dos úniques cintes en llingua asturiana qu'aspiren a llevar el premiu de 400 euros. Tamién compiten 'Ihesa', d'Alejandra Díaz Castaño; 'Llegar', de K. Prada y y J. Prada; 'La clase', de Julio de la Fuente; 'Parque', de Mateo Garlo; 'Sonríe', de Pablo Vara; y 'Negrea', de Juan Luis Ruiz.

De llunes a vienres van proyeutase en dellos puntos del conceyu los curtiumetraxes que participen na seición oficial de CINESAN, mentes qu'hasta'l domingu van entamase delles actividaes paraleles como talleres, conferencies, visionaos de llargumetraxes o una esposición. La gala de clausura y entrega de los premios del festival tendrá llugar la tarde del día 11 nel Teatru Municipal.

 

Contador Estadistiques