Dos cuartos y dos quintos premios reparten millones en dellos puntos d’Asturies

El Gordu de la Llotería de Navidá nun cayó n’Asturies, que tuvo que conformase con dos cuartos y dos quintos premios. Llanes, Candás, Xixón, Uviéu, A Veiga, Paredes, Avilés y Les Vegues son los llugares afortunaos nun sortéu que repartió nel país 5 millones d’euros.

El primer númberu vendíu n’Asturies con recompensa importante foi’l primer cuartu premiu, el 42.833, que se vendió en Llanes capital y en Posada, Candás, Xixón y Uviéu, dexando 1,2 millones euros. La mayor distribución foi en Llanes, onde llegaron 20 décimos, lo que supón 400.000 euros.

L’otru cuartu, el 91.179, tamién se repartió n’Asturies, en Paredes, concretamente en Parque Principado, nesti casu con 20.000 euros. Más perres dexó’l quintu 89.109, 3,6 millones d’euros n’Avilés y Les Vegues, población esta última que recibió un únicu décimu.

Completa la suerte asturiana otru quintu, el 34.345, vendíu n’A Veiga, onde dexó 60.000 euros.

El 86.148, na estación madrilana d’Atocha

La mayoría de les series del Gordu, el 86.148, vendiéronse en Madrid, na estación d’Atocha. Tamién dexó una bona lluvia de perres esti númberu, que llegó hasta Santoña y Ayamonte, en Las Palmas.

Na semeya, sortéu de la Llotería de Navidá esta mañana nel Teatro Real de Madrid.