Diez pallabres asturianes van llucir nun pabellón de Ljouwert con motivu de la capitalidá europea de la cultura

La población frisia de Ljouwert/Leeuwarden ye nel 2018 Capital Europea de la Cultura xunto cola maltesa Il-Belt Valletta y una de les iniciatives ye un Pabellón de les Llingües, nel van llucir diez pallabres asturianes que se van escoyer nuna campaña en redes sociales. Tamién va acoyer una selmana d’actividaes sobre l’idioma.

El coleutivu de defensa del frisiu Afûk, que coordinó les aiciones del Día Internacional de les Llingües Minorizaes en Redes Sociales, ta detrás d’esta iniciativa cola que pretende dar visibilidá a los idiomes minorizaos aprovechando esti eventu de tanta repercusión a nivel européu y mundial. Asina, va llevantase un Pabellón de les Llingües que va llucir nel so techu pallabres en multitú d’idiomes minorizaes y l’asturianu va tener un güecu nél.

Mirjam Vellinga contautó con Iniciativa pol Asturianu pa que collaborara nesti proyeutu y la organización decidió llanzar una campaña en redes sociales pa que sían los propios asturianos y asturianes les qu’escueyen cuáles deberíen ser les que se coloquen nel Pabellón de les Llingües. Asina, anima a tolos usuarios a suxerir la so pallabra favorita xunto cola etiqueta #PallabresLP18 en Twitter, Facebook o Instagram, tanto pela so cuenta como nes espublizaciones de la propia asociación.

La idea ta teniendo ésitu abondu, yá que son munches les persones que se tán animando a presentar les sos propuestes, ente les que se pue ver pallabres como raitán, llamber, oficialidá, caxigalina, llantar o cañicar, ente otres munches.

Selmana dedicada al asturianu

La presencia del asturianu nun va quedar namái nel techu del Pabellón de les Llingües, yá que tamién va protagonizar una selmana d’actividaes ente’l 6 y el 12 d’agostu. Estos díes va haber accesu información tocante a la nuesa llingua, como cartafueyos, productos audiovisuales y música, ente la que destaca una actuación de Xera.

“La idea ye poner Asturies nel mapa y esparder la nuesa realidá pel continente. Facenos ver, que sepan del nuesu casu y compartir el nuesu contestu col de Frisia y el restu d'Europa”, apuntó a Asturies.com Xosé B. Álvarez, responsable de Rellaciones Internacionales d’Iniciativa pol Asturianu.

Semeya obra de L-BBE baxo llicencia CC BY 3.0.