‘Derechos humanos en materia llingüística’: artículu 50.000 de la Wikipedia n’asturianu

|
‘Derechos humanos en materia llingüística’: artículu 50.000 de la Wikipedia n’asturianu

La Wikipedia n’asturianu superó los 50.000 artículos con ún dedicáu a los ‘Derechos Humanos en materia llingüística' y va celebralo esti sábadu en Bimenes con un Wikialcuentru. Jimmy Wales, fundador de la enciclopedia llibre, fíxose ecu d’esti fechu en Twitter.

Los voluntarios que conformen la comunidá de Wikipedia n’Asturies, dada la cercanía al artículu 50.000, decidieron entamar un Wikialcuentru pa conmemorar esti pasu dau recién, escoyendo pa ello Bimenes. “Teníemos un proyeutu pa desarrollar dixitalizaciones abiertes y talleres de formación en Bimenes, que fadremos más alantre, y decidimos apostar por esti conceyu pa entamar esti eventu”, esplica Víctor Suárez, organizador y ún de les cabeces visibles de Wikimedia Asturies.

Les razones son “la necesidá de potenciar la zona rural, escaecida pese a ser un porcentaxe mui altu del territoriu anque con poca población, y el compromisu pa col asturianu que fai Bimenes”, destaca Suárez, consciente de qu’esti tipu d’eventos suel entamase en zones urbanes. Asina, nel conceyu yerbatu van xuntase wikipedistes asturianos y otros que trabayen na Wikipedia en castellanu, en gallegu, n’eusquera y en catalán.

L’actividá va comenzar a les 10.30 hores na Casa Conceyu con una presentación na que va tar presente’l propiu Suárez; l’alcalde Aitor García Corte; Fernando Padilla, direutor xeneral de Planificación Llingüística y Normalización; y Xosé Antón González Riaño, presidente de l'Academia de la Llingua Asturiana. Darréu, a les 11.30 hores, los participantes van facer la Ruta de los Molinos de Bimenes, cola intención de facer semeyes y xeollocalizar la ruta pa l’aplicación de navegación Open Street Maps, alternativa a Google Maps que respeta la toponimia oficial asturiana.

Tres una posa pa xintar, a les 16.30 hores los inscritos van participar nel I Wikimaratón sobre la Llinga Asturiana a lo llargo de trés hores nel Telecentru de Martimporra, “que consiste en crear o ameyorar artículos sobre un tema en concreto”, nesti casu sobre’l nuesu idioma. Pa finar la xornada, va entamase una Wikifolixa con productos asturianos.

Entraes reivindicatives

Dende Wikimedia Asturies decidieron apostar por artículos significativos p’algamar la cifra de los 50.000 artículos cola intención d’afondar  na “situación dramática y la minorización que vive l’asturianu”, apunta Suárez. Asina, el 49.999 dedicóse a ‘Inxusticia’, el 50.000 a los ‘Derechos Humanos en Materia Llingüística, el 50.001 a la ‘Declaración Universal de los Derechos Llingüísticos’, el 50.002 al ‘Comisariu de Derechos Humanos del Conseyu d’Europa’ y el 50.003 a Nils Muižnieks, persona qu’ocupa dichu cargu.

En total, hai agora 50.005 artículos espublizaos n’asturianu, lo que convierte al nuesu idioma nel 81 d’ente les 290 esistentes na enciclopedia llibre. La repercusión d’esti fechu foi bien importante en redes sociales, con felicitaciones de dellos puntos del planeta de la comunidá Wikipedia, como la inglesa, la galesa o la colombiana, que pa ello emplegó inclusive la llingua asturiana.

Hasta’l fundador de Wikipedia, Jimmy Wales, que recibiera nel 2015 el Premiu Princesa de Asturias de Cooperación Internacional, fíxose ecu d’esti fechu y retuitó na so cuenta personal –con 130.449 siguidores– la entrada de Wikimedia Asturies qu’anunciaba esta cifra.

Asturies representada en Montreal

Suárez va llevar la situación el asturianu tamién a la convención añal de la Wikimedia Foundation, qu’esti añu va celebrase en Montreal, tres recibir una de les cien beques que s’entreguen pa ello. Ésta va celebrase del 9 al 13 d’agostu nesta ciudá canadiense y el representante de Wikimedia Asturies va participar en grupos de trabayu onde va poder “visibilizar la situación de la llingua asturiana y de la propia Wikipedia n’asturianu”.

Contador Estadistiques