De Navidá a Añu Nuevu, ocho díes por enteru

Asturies vive una fiestes diferentes, marcaes poles restricciones pola COVID-19.

Güei ye Nuechebona, xornada de xuntanza y tradiciones. N'Asturies ta recuperándose con fuercia la del nataliegu, ritual que taba a piques de desaniciaes y que consiste na quema d’un tueru d’un árbol, les más de les veces de carbayu, qu’ambura tola nueche y que se recueye a la mañana siguiente, día 25.

Los restos recoyíense y guardábense hasta l’añu siguiente, cola intención de qu’esti ritual traxera fertilidá a la casa y al ganáu, y que defendiera a los sos habitantes del mal. Esti añu tamién tán dexándose ver munchos ramos de Nadal, que consisten nuna cadarma de madera de forma triangular con 12 veles, una per cada mes del añu, de la que se cuelguen ufriendes.

Pa conocer sobre estes fiestes, el so orixe y les so tradiciones pueden consultar el nuesu espaciu d'Asturies.com ‘Ye tiempu de… Navidá’. En 'A la Gueta los Suaños' tamién ta disponible un reportaxe sobre la Navidá, una ficha didáutica sobre'l nataliegu y un reportaxe sobre'l personaxe navidiegu L'Anguleru, que nun va poder ser recibíu poles neñes y neños esta tarde en L'Arena, como ye vezu, pero que yá ta per Asturies cola confirmación de que va repartir regalos esta nueche peles cases asturianes con toles midíes de seguranza.

Les normes anti-coronavirus

Pa evitar contaxos y l'espardimientu del coronavirus SARS-CoV-2, el Gobiernu afitó delles midíes. Asina, nun permite más de 6 persones de, como máximo, dos grupos de convivientes, nes celebraciones de Nuechebona, Navidá, Nuechevieya, Añu Nuevu y Reis.

D'igual forma, esta nueche, al igual que'l 31, el toque de queda amplíase pa tornar al llar hasta les 00.30, con final a les 7. El restu de xornaes caltiénse de 23 a 6 hores.

Nun va haber cabalgates de Reis nin actividaes qu'axunten munches persones, pero los conceyos asturianos preparen el mou de que la reciella pueda saludar a L'Anguleru y a les máxiques maxestaes en diferentes formatos.