"De la cayida del réxime del 78 ñacerán les repúbliques de pueblos llibres", señaló Morales

|
Josu Juaristi, Llucía Fernández Marqués y Pau Morales presentación Agora Repúbliques

Presentóse n'Asturies la coalición Agora Repúbliques, na que participa Andecha Astur, con representantes d'EH Bildu y ERC.

"Nin la represión, nin la violencia d’Estáu, nin los recortes de derechos sociales mos achantarán. Los pueblos que sufrimos l’Estáu decidimos ganar. De la cayida del réxime del 78 ñacerán les repúbliques de pueblos llibres", afirmó Pau Morales, voceru nacional de Jovent Republicà –mocedaes d'Esquera Republicana de Catalunya (ERC)– nel actu celebráu'l vienres na Escuela Antigua de Comerciu de Xixón. Enantes d'él intervino Josu Juaristi, eurodiputáu de Los Pueblos Deciden, coalición na que participa Andecha Astur y que tien continuidá con Agora Repúbliques cola incorporación d'ERC y Congreso Nacional de Canarias.

El vascu destacó la importancia de caltener la representación nel Parllamentu Européu, sobre manera en respuesta del aumentu de la estrema derecha en tol continente. Anguaño, Los Pueblos Deciden suma un eurodiputáu, mentes qu'ERC, que lideró nel 2014 la coalición Esquerra pel Dret a Decidir en xunidá con Nova Esquerra Catalana y Catalunya Sí, cuenta con dos.

La llista d'Agora Repúbliques, conformáu por Andecha Astur, EH Bildu (Euskal Herria), BNG (Galicia), Puyalón de Cuchas (Aragón), Ahora Canarias y ERC (Catalunya), va tar liderada por Oriol Junqueras, políticu catalán na cárcel de manera preventiva pol 'procés', siendo'l numberu 2 pa la tamién catalana Diana Riba, el 3 pal vascu Juaristi'l y el 4 pa la gallega Ana María Miranda.

Homenaxe al Conseyu Soberanu

Nel actu tamién intervino Llucía Fernández Marqués, candidata de la formación nacionalista al Congresu. “Nun ye tiempu de llorar, nin de mirar pa otru llau. Nun ye tiempu de mendigar ayudes nin de sentase a esperar a ver qué mos manden dende Madrid. Dientro y fuera d’Asturies, ye tiempu de sumar fuercies, y ye por ello qu’Andecha Astur preséntase énte’l pueblu asturianu comu una ferramienta d’organización que permita xunir fuercies p’avanzar hacia una República Asturiana na que’l pueblu seya, otra vegada, soberanu" afirmó.

Tres la presentación, entamósu un homenaxe al Conseyu Soberanu d'Asturies y Lleón na Casa Blanca, edificiu que fora sede de la institución.

Na semeya, Juaristi, Fernández Marqués y Morales.

Contador Estadistiques