David Guardado publica en mayu l'ensayu ‘Nunca vencida’

‘Nunca vencida. Una historia de la idea d’Asturies’ ye’l títulu d’un llibru básicu pa entender la realidá presente d’Asturies. David Guardado repasa con detalle nesti ensayu “les idees, mitos y discursos sobre Asturies qu’a lo llargo de la historia, dende la Edá Media hasta güei, compitieron por ser dominantes, amosando’l calter ideolóxicu y l'axenda política a la que sirven”.

La Fabriquina asoleya esti trabayu “valiente y revelador”, 524 páxines frutu d’un escomanáu llabor d’investigación, como amuesa la so amplísima bibliografía. “Dende una perspectiva inédita, la obra analiza cómo la interpretación de los símbolos y la historia d’Asturies (los astures, Pelayo, Cuadonga, la francesada, la bandera la llingua asturiana o la Revolución d’Ochobre), faen parte d’una batalla na que l’autor estrema dos xenealoxíes ideolóxiques opuestes: una mira al futuru y básase na afimación de la singularidá asturiana, mientres que la otra mira al pasáu y constrúise dende la renuncia y la señardá”, apunta la editorial.

“Asturies, cuna d’España o baluarte de l’anti-España; semiente de la plurinacionalidá peninsular o xerme de la so unidá; pionera del llaicismu o abellugu del catolicismu”, contrapón Guardado, fundador d’Asturies.com xunto con Fernando de la Fuente y recién nomáu académicu de númberu de l’Academia de la Llingua Asturiana. Va ser el vienres cuando sía recibíu pola institución, Día de les Lletres Asturianes y xornada na que s’espera que yá tea disponible ‘Nunca vencida. Una historia de la idea d’Asturies’ nes llibreríes del país.

Pilar Sánchez Vicente firma’l prólogu d’esti ensayu, segundu qu’espubliza’l filólogu, que nel 2008 sacó con Araz –empresa editora d’esti mediu dixital– ‘Llingua estándar y normalización llingüística. La revitalización de les llingües subordinaes’.