‘Cúntame un cuentu’, dieciocho histories que sirven de “ferramientes educatives pa centros y biblioteques”

|
VI Feria del Llibru y Discu n'Asturianu.jpg

Esti xueves inauguróse n’Avilés la VI Feria del Libru y el Discu n’Asturianu cola presentación de ‘Cúntame un cuentu’ y ‘Cúntame un conto’, llibros conmemorativos de la XXXIX Selmana de les Lletres Asturianes. Éstos recueyen dieciocho histories pa poder emplegar como “ferramientes educatives” pa la reciella.

Otros tantos escritores y dibuxantes participen de manera desinteresada nesta iniciativa que busca ser “un termómetru del estáu de la nuesa lliteratura dedicada a la xente mozo; un llibru qu’amosare la cantidá y la calidá de los nuesos autores y de los y les ilustradores d’Asturies”, esplicó Chechu García Fernández, xefe de serviciu de Planificación Llingüística y Normalización. Ésti divídise en dos partes, una dedicada a los más neños y otra a los más mozos, yá que la edición d’esti añu de la Selmana tien como exa central la lliteratura infantil y xuvenil.

Catorce de les histories tán feches por creadores qu’empleguen davezu l’asturianu, mentes que cuatro fáenlo en gallego-asturiano, anque toos ellos tornáronse al otru idioma según el llibru que fora. Asina, la versión pal occidente del país ye en fala dafechu, permitiendo que sirva de material pa les escueles del llugar, yá qu’ún de los oxetivos d’esta edición, fecha con munchu precuru por Trabe, ye que sirva como “ferramientes educatives pa los centros y biblioteques”, espresó García Fernández.

Darréu destacó’l “xorrecer” de la lliteratura infantil y xuvenil “que tien muncho que ver cola escolarización y l’alfabetización de la llingua asturiana y el gallego-asturianu”, que permite “que los neños y les neñes s’averen más fácilmente” a la llectura nes llingües llariegues. ‘Cúntame un conto’ y ‘Cúntame un cuentu’ tien una tirada de 700 y de más de 3.500 exemplares, de manera respeutiva, que se pueden algamar faciendo una merca mañana en más de mediu centenar de llibreríes d’Asturies con motivu del Día de les Lletres Asturianes, amás de na propia Feria del Llibru y Discu n’Asturianu hasta’l domingu.

Los autores que participen son María José Fraga (con ilustraciones d'Alberto Pieruz), Maite G. Iglesias (Raquel Bonita), Iris Díaz Trancho (Gloria Caamaño), Rafael Cascudo (Raquel Lagartos), Sidoro Villa (Pablo Álvarez), Enrique Carballeira, Aurora Bermúdez (Goyo Rodríguez), Belén Rico (Ana Sáez del Arco) y Berta Piñán (Francisco Pimiango), na estaya infantil, y Xulio Berros (Sonia García), Milio Rodríguez Cueto (David G. Ferrero), Adolfo Camilo Díaz (Germán Tejerina), Marisa López Diz (Rubén Megido 'Rugido), Carlos González Espina (Marina Lobo), Vicente García Oliva (Juan Hernaz), Paquita Suárez Coalla (Carmen Hevia), Montserrat Garnacho (Alfonso Zapico) y Ismael González Arias (Ruma Barbero), na xuvenil.

Públicu mozu

A la inauguración d’esti certame, que repite na plaza de Domingo Álvarez Acebal, tamién acudió Rafael Gutiérrez Testón, presidente de l’Asociación de Llibreros del Principáu d’Asturies; Yolanda Alonso, conceyala de Promoción Social y Cultura; y Fernando Padilla, direutor xeneral de Planificación Llingüística y Normalización. Como públicu, amás de ciudadanos, representantes políticos y responsables de dellos servicios de normalización llingüística, acudieron unos convidaos mui especiales: les escolines y escolinos del IES Carreño Miranda, ganadores del concursu audiovisual entamáu esti cursu pol Conceyu d'Avilés con 'Movimientu asturianu'.

Gutiérrez Testón destacó la importancia de la feria ente les que celebren n’Asturies, calificándola amás “de la más necesaria” porque permite que “al menos una vegada al añu, la lliteratura y la música fecha n’asturianu tenga’l protagonismu nos cartelos d’esta gran llibrería que nos ocupa”. Nesi sen, llamó por qu’esa visibilización s’estienda “al restu del añu”.

La edil socialista felicitó en primer llugar a les neñes y neños premiaes, convidándolos “a lleer lliteratura n’asturianu, porque la cultura d’una sociedá, d’un pueblu, manifiéstense sobre manera nes creaciones culturales”. Llueu destacó la importancia de la tresversalidá y defendió’l llabor que l’equipu de gobiernu municipal, encabezáu por Mariví Monteserín, ta faciendo nesi sen no que respeuta al usu del asturianu nel Conceyu.

Pela so parte, Padilla, emponderó’l papel que xuega la lliteratura infantil y xuvenil, “un elementu fundamental na normalización de la llingua pa crear vezos de llectura na xente más mozo”. Darréu, en declaraciones a Asturies.com, amosó lo so satisfación pol desarrollu de la Selmana de les Lletres, “con bastante ésitu de públicu y acoyida ente la xente, como la inauguración del actu d’esta feria. Esperemos que les ventes sían equiparables”, deseó.

Abiertu hasta'l domingu

Les llibreries llocales Casona y Noveno Arte encárguense de la xestión de la feria con una caxa única. En total, tán disponibles unes 300 referencies de llibros tanto pa mozos como p’adultos y 60 de discos, que tán a la venta n’horariu de 11 a 14 y de 17 a 21 hores, a esceición del domingu, que va abrise de siguío de 11 a 19 hores.

Mientres estos cuatro díes van celebrase nel llugar presentaciones de llibros, conciertos, actividaes pa neñes y neños, alcuentros y talleres lliterarios. Pue consultar el programa calcando equí.

Na semeya, llibros infantiles a la venta na feria avilesina.

Contador Estadistiques