Actividaes de la VI Feria del Llibru y el Discu n'Asturianu

Del xueves al domingu van celebrase na carpa llevantada na plaza de Domingo Álvarez Acebal presentaciones de llibros, conciertos, actividaes pa neñes y neños, alcuentros y talleres lliterarios. Asina a lo llargo d’esta tarde va entamase’l taller ‘Marcapáxines imaxinaries’, tando previsto pa les 18 hores la presentación de ‘La mar’, d’Adolfo Camilo Díaz, y a les 19 hores un alderique presentáui por Xosé Ramón Iglesias Cueva sobre los llibros ‘Obres (in) completes de Don Enrique García-Rendueles’, de Vicente García Oliva, y del fácsimil del poemariu de Matías Conde ‘Sol en los pomares’.

La presentación de ‘Había úa vez… 101 contos del conceyo del Franco’ de Martín de Villar abre les actividaes previstes mañana al meudía, a lo que va siguir una hora más tarde un alcuentru d’ilustradores collaboradores de ‘Cúntame un cuentu’, cola presencia d’Alberto Pieruz, Goyo Rodríguez, Ana Sáez del Arco, Juan Hernaz y Ruma Barbero. De 17 a 21 hores va desendolcase’l taller infantil ‘La llibretina de los deseos’, mentes qu’a les 18 hores Ana Morán va contar ‘Cuentos prestosos’.

El taller del sábadu, dende les 12 a les 21 hores, ye ‘Llaverinos intelixentes’. A les 13 hores va presentase les traducciones de los famosos llibros del suecu Carl-Johan Forssén p’ayudar a dormir a la reciella, obra de Xesús González Rato, mentes que pela tarde ta previstu’l previstu’l cuentacuentos ‘Coses prestoses’ de Sabel Tuñón y, a les 20 hores, l’actuación de Luis Núñez y Los Folgazanes, grupu ganador de la edición última del Premiu al Meyor Cantar con ‘La ñeve y la esmeralda’.

El día caberu, el domingu, va haber música tamién pola mañana, nesta ocasión con Alicia Álvarez y David Varela y el proyeutu ‘Bestiariu’, discos producíos por La Fabriquina y editáu por Araz.net, empresa editora tamién d’Asturies.com. Una hora más tarde Inaciu Galán va presentar ‘Patria en pallabres menores’ y, yá de tarde, a les 17 hores, va celebrase el conciertu didáuticu infantil ‘Poemes de carambelu’, de Mestura, pa zarrar a les 18 hores con una sesión nueva de cuentacuentos con Tuñón, nesta ocasión con ‘La bruxa Pumarina y el dragón Maragatu’.

L'horariu de la feria ye'l siguiente: de 11 a 14 y de 17 a 21 hores, a esceición del domingu, que va abrise de siguío de 11 a 19 hores.