Cúmplense 85 años del nacimientu en Xixón del Conseyu Soberanu d'Asturies y Lleón

El 24 d'agostu del 1937 roblóse na villa, na nomada 'Casa Blanca', el decretu qu’afitaba la soberanía de los territorios alministraos pol Conseyu Interprovincial d'Asturies y Lleón.

Nun entraría en vigor hasta un día depués, espublizándose na prensa’l 26 d’agostu. Esti pasu hacia la independencia llegaba pol aisllamientu que vivía'l país tres la toma de les tropes del bandu nacional de los territorios vecinos nel marcu de la Guerra Civil, situación que llevó a los republicanos asturianos a tomar la decisión.

El decretu que creaba'l Conseyu Soberanu d'Asturies y Lleón fimábase'l día 24, pero entraría a valir el día siguiente. El 26 ye cuando la prensa facíase ecu d'esti fechu históricu.

Toles organizaciones polítiques y sindicales del bandu republicanu n’Asturies taben representaes nesti Gobiernu, presidíu por Belarmino Tomás, qu'emitió moneda y sellos propios y llegó a unviar un telegrama a la Sociedá de Naciones, aición esta última que foi'l principal principal motivu de resquiebra col Gobiernu de la República con sede naquel momentu en València. El PCE, sobre manera, y tamién dirixentes de les Xuventúes Socialistes Unificaes (JSU) y Izquierda Republicana criticaron la declaración unillateral d'independencia de 24 d'agostu.

El Conseyu Soberanu d'Asturies y Lleón tuvo activu hasta'l 21 d'ochobre, cuando les tropes nacionales entraron en Xixón y Avilés. Un día enantes, celebraba'l so aconceyamientu caberu.

Dende Asturies.com recordamos esta fecha con estos artículos de la nuesa hemeroteca:

• 1937, cuando'l gobiernu asturianu declaró la soberanía
• La composición del Gobiernu Soberanu
• El polémicu telegrama del Conseyu a la Sociedá de Naciones
• La prensa americana anunciaba hai 81 años la creación d'un "estáu asturianu"​

Na semeya, moneda acuñada pol Conseyu Soberanu d'Asturies y Lleón, nomada popularmente 'belarminos'.