Cuideiru prepárase pa L'Amuravela

Asturies vive una selmana cargada d'eventos festivos como la folixa pixueta, los Exconxuraos, San Pedro en Castiello o la Fiesta de la Oficialidá de Bimenes.

Mañana, coincidiendo cola festividá de San Pedro y San Pablo, Cuideiru vive L'Amuravela. L'actu más importante ye la llectura del sermón –llaicu–, recitáu en versu y en pixuetu por una mesma persona del llugar –dende'l 1995 encárgase Cesáreo Marqués–, nel que se resumen los acontecimientos más importantes vivíos nel pueblu mientres l'añu. Ésti va tener el so aniciu a les 13.15 hores.

Llanera celebra los Exconxuraos dende'l vienres y hasta'l domingu, folixa que conmemora la procesión fecha nel 1412 por vecinos del conceyu hasta Uviéu en busca del perdón pa que se-yos quitase la escomunión que recibieren cuatro años atrás. La cena medieval del sábadu ye l'eventu central de les fiestes, tres la representación histórica prevista pa les 20 hores. El vienres, mentes, actúa Nuberu a partir de les 23 hores nuna verbena na que tamién va tar la orquesta Sonora Real.

En Xixón, la parroquia de Castiello entama San Pedro, la folixa quiciabes con más tirón popular de les que se celebren nel conceyu. Éstes comiencen güei con una verbena con Pasito Show y Limón, pa siguir hasta'l domingu con Assia (mañana), Cuarta Calle y Havana Espectáculos (vienres) y Cayenna y tamién Havana Espectáculos (sábadu).

Dende güei Bimenes ta celebrando la Selmana de la Oficialidá, que va tener el so día grande'l sábadu. Calcando nesti enllaz pue atopar tola información sobre la XXI Fiesta de la Oficialidá.