Cotiello va ser la pregonera de la XXIII Fiesta de la Oficialidá de la Llingua Asturiana en Bimenes

Yá tán en marcha tolos preparativos pa la XXIII Fiesta de la Oficialidá de la Llingua Asturiana cola que Bimenes celebra tolos años la declaración d’oficialidá del 1997. Ésta va desendolcase nes feches tradicionales, el 6 de xunetu, y María Cotiello va ser la pregonera.

El 5 de xunetu del 1997, baxo’l mandatu de Joaquín ‘Xuacu’ García Gutiérrez, el Conceyu de Bimenes declaró la oficialidá de la llingua asturiana nel conceyu. Un añu depués torgaríala’l Tribunal Superior de Xusticia d’Asturies (TSXA) al considerar que nun tenía competencia pa ello, al igual que los otros ayuntamientos que siguieron el camín de Bimenes, pero les yerbates y yerbatos siguieron celebrando tolos años esti pasu alantre na defensa de los derechos de los falantes d’asturianu.

L’alcalde actual, Aitor García Corte, tornó a declarar la oficialidá en Plenu nel 2016 coincidiendo col venti aniversariu de la folixa, decisión aprobada por unanimidá. Un xestu nuevu de sofitu de Biemenes a la llingua asturiana, que cuenta con una vitalidá grande ente los tolos vecinos del conceyu.

El sábadu 6 de xunetu va volver a festexase esta efeméride con una serie d’actividaes entovía por confirmar, tornando asina a la fecha tradicional depués de que l’añu pasáu s’adelantara un mes pa nun coincidir col Festival de la Sidra de Nava. Lo que sí se conoz ye la persona que tendrá’l privilexu d’apregonar la fiesta, la mierense Cotiello.

Actriz nacida en Xixón, anque de Grillero, ye un rostru bien conocíu pola so presencia en series y filmes de popularidá grande como ‘La República’, ‘Centro médico’ o ‘Trece rosas’, ente otros munchos. Tamién por conducir el programa en llinguaa sturiana ‘De cai’ pa TPA.

El so compromisu col asturianu ye bien conocíu, participando amás como profesora na Universidá Asturiana de Branu (UABRA), o n’eventos entamaos pola Xunta pola Defensa de la Llingua Asturiana (XDLA) o na gala del Premiu al Meyor Cantar. “Por toes este razones, pal Ayuntamientu Bimenes ye un arguyu poder tenela equí’l primer sábadu de xunetu, en Martimporra, apregonando la XXIII Fiesta de la Oficialidá de la Llingua Asturiana”, afirmen dende’l Conceyu.

Na semeya, Cotiello llee'l manifiestu de la histórica manifestación ‘L’asturianu llingua oficial ¡agora!’ entamada n'Uviéu pola XDLA'l 21 d'abril del 2018.