Bimenes celebra la Selmana pola Oficialidá y prepara la Fiesta del sábadu

Les yerbates y yerbatos tán de celebración. Esta selmana ye la Selmana pola Oficialidá de Bimenes, que remata’l sábadu cola XXIII Fiesta de la Oficialidá de la Llingua Asturiana cola que’l conceyu conmemora la declaración d’oficialidá del 1997.

L’actividá nel día grande va comenzar a les 12.30 hores na plaza de la Casa Conceyu cola intervención institucional del alcalde, Aitor García Corte, a lo que va siguir la llectura del pregón, qu’esti añu va correr a cargu de l’actriz María Cotiello. Darréu va celebrase la Danza de la Oficialidá y un pasucais protagonizáu pol Ensame de Música Tradicional Los Yerbatos y los Pauliteiros de San Martino, grupu de danza tradicional veníu de Miranda de l Douro, territoriu portugués hermanáu con Bimenes onde la llingua propia, el mirandés, pertenciente al tueru asturlleonés, ye oficial.

Los bailles prollongaránse nel Palaciu del Marqués de Casa Estrada, tamién en Martimporra, onde va entamase una xira popular. Toles persones que lo deseen pueden llevar la comida de casa y xintar nel prau, mentes que los quiera acutar plaza na carpa tienen de plazu hasta mañana, pa lo qu’han d’avisar na Casa Conceyu.

Yá de tarde van siguir les actuaciones, la primera a les 16.30 cola Bandi-Ne. A les 17.30 hores va celebrase’l VI Concursu d’Escanciadores de Bimenes, puntuable pal Campeonatu d’Asturies d’Echadores de Sidra, pa siguir a les 20.30 hores tamién cola Bandi-Ne y con un taller de baille tradicional, a cargu de María Vázquez y Pau Santirso, pa garrar unes nociones de cara al Bimenes en Danza de pela nueche (22.30 hores) con Bandi-Ne, Pandereteres de Fitoria y Cantaruxare.

Enantes los presentes van cenar nel prau y van disfrutar de canción asturiana con Alicia Villanueva y Carlos Velasco.

Actividaes pela selmana

La Selmana pola Oficialidá nun se va centrar namái nes actividaes del sábadu. El Conceyu de Bimenes entama dellos eventos pal xueves y el vienres colos qu’allargar la celebración mientres se calecen motores de cara a la XXIII Fiesta de la Oficialidá de la Llingua Asturiana.

Na Casa Cultural de Santuyano, el xueves a les 18.30 hores, tres una presentación d’Inaciu Galán, van proyeutase los documentales ‘La vida ensin oficialidá. Les consecuencies de la falta de drechos llingüísticos n’Asturies’ y ‘El valir económicu d’una llingua’ ellaboraos por Iniciativa pol Asturianu de cara a los dos seminarios qu’entamó la organización nel Edificiu Históricu de la Universidá baxo’l títulu ‘Oficialidá, el camín constitucional pal futuru del asturianu’. Darréu, a les 20 hores, va presentase’l llibru ‘Todo a cien. 100 lletres de 100 cantares’ (Saltadera) de Tante Blanco, músicu que fora fundador de Los Berrones.

Nel mesmu llugar, el vienres a les 19.30 hores, va representase la obra ‘Una apuesta que nin pintada’, a cargu del Grupu de Teatru de La Puente Arriba.