Constitúise la primer agrupación llocal d'Aína

Entama en Sama #AbrimosCamín, campaña que trabaya nun calendariu d'alcuentros en más d'una decena de conceyos del país.

L'Agrupación Llocal d'El Nalón va ser la primera d'Aína. Esta tarde, a les 19.30 hores, va constitúise formalmente na Casa Cultura, actu abiertu tamién a les persones non inscrites a esta formación asturianista d'izquierda nueva que ta pendiente de la celebración próxima de la so primer Asamblea Nacional.

Cola creación de les agrupaciones llocales "el partíu busca consolidar l'afiliación de les persones inscrites, llegar a más xente y arrancar el so trabayu políticu dende la cercanía, pa dar respuesta a les necesidaes de parroquies, barrios y conceyos". El conceptu de cercanía ye dalgo no que los promotores d'Aína quieren calcar p'avanzar nos sos oxetivos de "asturianizar la política; señalar y dar arreglu a les desigualdaes sociales esistentes n'Asturies; ufrir una alternativa pa qu'Asturies algame les mayores cotes d'autogobiernu a nivel políticu, económicu y sociocultural; y rexenerar la política asturiana".

Más de venti persones tán detrás de la puesta en marcha de l'Agrupación Llocal d'El Nalón. Nel actu van tratase colos asistentes dalgunes de les problemátiques qu'afeuten a los conceyos del valle.

Na imaxe, semeya promocional del partíu con impulsores del mesmu que xuega coles etiquetes #HaiCamín y #AbrimosCamín.