Aína celebró’l so Congresu Fundacional por “una Asturies na que poder vivir y trabayar con dignidá y mirando al futuru”

|
Congresu Fundacional d'Aína

Con optimismu y ilusión arrancó esti domingu en Corvera un proyeutu políticu asturianu nuevu. Aína celebró’l so Congresu Fundacional en Les Vegues con más d’un centenar de persones presentes y l’enfotu d’algamar “una Asturies na que poder vivir y trabayar con dignidá y mirando al futuru” y “una salida de la crisis pensada dende Asturies”.

Son dalgunes de les idees plantegaes per les cuatro hores de llargor d’un congresu al qu’acudió cásique la metá de l’afiliación d’Aína. El congresu entamaba con música, l’amuesa de cartelos del partíu y los aplausos de les munches persones qu’axuntaron con ganes de trabayar pa dar emburrión a esti partíu políticu.

Darréu llegaron les diferentes intervenciones, alderiques sobre les cuatro ponencies (ideolóxica-política, estratéxica, organizativa y d’estatutos) y de les enmiendes presentaes pola militancia, y aprobación de los documentos. Por último, ente los presentes, escoyéronse a 19 persones que van conformar la Mesa Nacional, de calter provisional, que se va encargar de dirixir los primeros díes de vida de la organización y la so llegalización, asina como d’entamar una Asamblea Nacional pa la que yá esisten una bayura de documentos d'orientación polos que se mandar.

El grupu promotor d’Aína valoró de manera mui positiva la participación nel Congresu Fundacional y rescampló los perfiles diversos de la Mesa Nacional, buscando representar asina la variedá qu’esiste n’Asturies. Pa zarrar la xornada entamóse una xinta popular nel que los afiliaos pudieron conocese y siguir aldericando, yá de manera informal, sobre esti proyeutu.

“Ábrese asina, un nuevu ciclu políticu na tradición del asturianismu d'izquierda, con un procesu que va valir pa dar los primeros pasos d'Aína y avanzar nel procesu d'organización”, apuntaron los promotores.

Na semeya, un momentu del congresu celebráu nel Teatru El Llar.

Contador Estadistiques