Confirmóse'l positivu de Martínez Oblanca

El diputáu de Foro nel Congresu tuviera síntomes y esperaba confirmación tres la detección de COVID-19 nun test rápidu.

Isidro Martínez Oblanca ta pasando'l coronavirus SARS-Cov2 depués de dar positivu na prueba por PCR fecha'l vienres, un día depués de que-y deteutaren anticuerpos d'IgG un día enantes. De profesión enfermeru, el congresista tuvo trabayando'l mes últimu na Cruz Bermeya de Xixón pa facer frente a la crisis sanitaria por cuenta la pandemia de COVID-19 en plantes nes que nun había contautos con pacientes con coronavirus.

Martínez Oblanca alcuéntrase bien y caltién la so actividá política en confinamientu. El día siguiente de confirmase'l so positivu escribió en Twitter pa llamentar la muerte de Pilar Fernandez Hinojal, responsable de la seición de 'Coros y Danzas' del Real Grupo de Cultura Covadonga.