Comité de les Rexones (Xunión Europea): "Una llingua minoritaria supón creatividá, innovación y desarrollu"

La institución europea recuerda que'l Tratáu de Lisboa protexe espresamente les llingües minoritaries de la Xunión y apurre más argumentos a favor de la oficialidá del asturianu. El documentu, aprobáu por unanimidá, asegura que la diversida llingüística supón "creatividá, innovación y desarrollu", contribuyendo al desendolcu económicu.

La selmana pasada Asturies.com asoleyaba una resolución del Conseyu d'Europa na que se falaba de que la potenciación de les llingües minoritaries ye un activu económicu importante pa les comunidaes nes que se falen estes llingües.

Pero esti documentu nun ye l'únicu nel que se fala de les llingües como un hipotéticu elementu de desarrollu comunitariu sinon que tamién dientro de los organismos de la Xunión Europea existen dellos encamientos y recomendaciones nes que se plantega la promoción de les llingües rexonales nos mesmos términos.

Otru de los documentos más importantes nesti sen ye'l Dictame sobre la 'Protección y el desarrollu de les minoríes llinguístiques históriques acordies col Tratáu de Lisboa', un conceptu, les minoríes llingüístiques históriques nes que ta enxerta la llingua asturiana d'alcuerdu col marcu de la 'Carta Europea de les Llingües Rexonales y Minoritaries'.

Nesti documentu, aprobáu en 2011 por unanimidá, el Comité de les Rexones rescampla "l'impactu positivu de les llingües minoritaries y la diversidá llingüística n'Europa, tanto la pa ciudadanía como pa la so comunidá de pertenencia en particular, que dexen amás favorecer la creatividá y la innovación nel contestu d'una valoración de cada patrimoniu cultural, lo que tamién contribúi al desendolcu económicu".

Les consecuencies del Tratáu de Lisboa

El dictame destaca tamién la evolución nesti sen del derechu comunitariu y en concreto del Tratáu de Lisboa, qu'introduz espresamente'l respetu a la bayura y diversidá cultural y llingüística como un elementu clave de la salvaguarda y el desarrolllu del patrimoniu cultural européu. 

Poro, el Comité de les Rexones afita la necesidá d'un "fundamentu xurídicu reforzáu" que dexe formular una política específica, con financiación abonda, en beneficiu de las minoríes llingüístiques.