Ciudadanos fai chancia sobre la torna al castellanu de 'Tierra' pa homenaxar a Elías García

"Esta xente nun tien razón nin corazón", asegura Anabel Santiago, de Somos Uviéu.

La Comisión d'Educación y Cultura del Conceyu d'Uviéu trató ayeri la torna al castellanu del cantar 'Tierra' de Felpeyu nel programa de la segunda xornada de la fase eliminatoria del ‘XXVIII Concurso y Muestra de Folclore Ciudad de Oviedo’, celebrada’l día 17, nun 'homenaxe' a Elías García, músicu componente de Felpeyu fináu en setiembre, lo que xeneró numberoses protestes al consideralo como una falta de respetu a la memoria del intérprete del violín nesi tema y a la propia banda. Foi la formación la morada la que llevó l'asuntu al orde del día, con delles entrugues al respeutu.

Santiago lo que nun esperaba yera qu'esti tema tan seriu se convirtiera nun asuntu de chancia pa Ciudadanos. Según el rellatu de la cantante, José Luis Costillas, conceyal d'Educación, Cultura, Centros Sociales, Salú Pública y Consumu, insistía en que la torna ensin permisu de la lletra nu suponía falta nenguna de respetu al artista y a la so memoria, mentes que la edil delegada d'Educación, Salú Pública y Consumu, Yolanda Vidal, tabién de Ciudadanos, llegó a afirmar que nun disponía d'una 'ouija' pa pidir derechos de autor a autores finaos, yá sía Elías García o Verdi, comentario que provocó risotaes ente los representantes del partíu naranxa y del PP.

“Salí de la xunta con mui mal cuerpu. Esta xente nun tiene razón ni corazón. ¿Cómo pueden llegar a dicir que nun tienen una 'ouija' pa pidir derechos a autores finaos? Creía, de bona fe, que los despropósitos del programa yeren un error, qu'echaríen balones fuera y poco más. Pero lo que fixeron nesta comisión vergoñosa ye reafirmase nos sos prexuicios hacia la llingua y la cultura asturiana, tolo que-yos rezume a tradición, como se vio tamién en tolos recortes presupuestarios”, aseguró la edil de Somos Uviéu, a la que Vidal acusó de tener prexuicios col castellanu.

Na semeya, Santiago, a la izquierda, xunto cola so compañera Ana Taboada.