Cinco décimos del 88.008, el Gordu de la Llotería de Navidá, vendiéronse en Xixón, Uviéu y Llanes

El sortéu de la Llotería Navidá foi dexando cayer primero los premios baxos pa dexar pal final los grandes, apaeciendo los últimos el segundu y el Gordu, el más tardíu de la historia, que resultó ser el 88.008. Cinco décimos del mesmu vendiéronse n’Asturies (2 en Xixón, 2 n’Uvieu y 1 en Llanes), qu'en total recibió cuasi 4,5 millones d'euros al contar tamién con otros cinco quintos.

A les 13.16 hores, 18 minutos más tarde que’l primer premiu que tenía hasta agora l’honor de facese esperar más, salió’l Gordu de la Llotería de Navidá, mui repartíu como vien siendo la norma coles formes nueves de venta y merca d’esti sortéu especial. La fortuna llegó a Madrid, Jaén, Écija, Vilamarxant, Dos Hermanas, Sevilla, Menorca, Aljucer, Cambre, Barcelona, Plasencia, Pla de Na Tesa, Montblanc, Madrid, San Nicolás de Tolentino, Casar de Escalona, La Zubia, Utebo, Granada, Las Palmas, Peñaranda de Bracamonte, Palma de Mallorca, Lleida, Pinos Puente, Badalona, Pobla do Caramiñal, Sant Vicenç dels Horts o Sevilla, ente otres decenes de sitios.

N’Asturies cayeron un total de cinco décimos, lo que suponen 2 millones d’euros (enantes d’impuestos). Dos foron pa Xixón, ún pa l'alministración del Centro Comercial Costa Verde y otru na númberu 5, de nome ‘El Búho de la Suerte’, asitiada na cai Palacio Valdés; otros 2 pa Uviéu, na cai Xovellanos y na númberu 27, en Juan Ramón Jiménez; y 1 en Llanes, na avenida de México.

Cuideiru celebró un segundu premiu col 58.303, que dexa na alministración númberu 1, en Suárez Inclán, 1.250.000 euros. El terceru, 31.938, y los dos cuartos, 93.361 y 41.147, nun tuvieron presencia n’Asturies, pero sí dellos quintos.

Cinco de los ocho quintos

El 45.353 vendióse en Xixón y Llanes; el 88.979, en Xixón, Uviéu, Avilés, Castropol, Cangas del Narcea y La Pola Llaviana; el 01.568 en Xixón y Ribeseya; el 86.007 en Xixón, Uviéu, San Cloyo, Llanes, Avilés, Lluanco, San Esteban, Muros y La Pola Llaviana; y el 57.421 en Xixón, Uviéu y Llanes. Nun se despachó nel país el 54.274, el 92.023 y el 37.038.

En total, el sortéu de la Llotería de Navidá dexó n’Asturies 4,48 millones d’euros, lloñe de la lluvia de millones del añu pasáu, cuando namái’l 05.490, el Gordu, repartió 148 millones en Morea que llegaron a Mieres al traviés de papeletes repartíes pol Club Atletismo Mieres. Tamién se vendiera un decimu n’Uviéu per máquina.