Científicos asturianos van estudiar el tren de bolos

Dos biólogos de la Dirección Xeneral de Pesca del Gobiernu del Principáu d'Asturies van participar nuna investigación sobre l'efectu del arte de pesca de "tren de bolos" nel fondu de la mar.

Dos Biólogos del Centru d'Esperimentación Pesquera de la Dirección Xeneral de Pesca d'Asturies van tar embarcaos hasta esti fin de selmana nel barcu d'esperimentación "Vizconde de Eza". El barcu, que lleva dende payares del 2.004 estudiando la biodiversidá y los recursos pesqueros del caladeru d'El Cachucho, asitiáu a 35 milles al norte de Ribeseya, va facer nesos díes un esperimentu pa peritar los daños que fai'l tren de bolos sobre los fondos marinos. El tren de bolos del Vizconde de Eza va probase nun llugar con profundidaes ente los 100-120 metros enfrente de la costa de Llastres, grabándose la pasada del tren con cámares de vídeo

El tren de bolos tien una rede d'arrastre, pero cola diferencia de que pela parte onde acaba la rede, que suel llevar amarrada una relinga con pesu pa que funda, amiéstase amás el "tren de bolos" un rodiellu fechu con aros de goma y de fierro que permite que la rede vaya barriendo tol fondu de la mar, cubriendo cada centímetru incluso nos fondos más irregulares. Va yá trés años, los pescadores asturianos movilizáronse pa protestar contra l'efectu d'esti arte que taben metiendo n'Asturies los barcos de delles grandes empreses pesqueres, les más d'elles de Galicia, onde s'acusa al tren de bolos de facer un dañu mui grave nos caladeros del país.

La guerra del "tren de bolos" desarrollóse nel añu 2001, entamando en xineru con un paru de la flota asturiana, que quedó amarrada nos puertos. Dos selmanes de fuelga remataron el 5 de febreru col compromisu del Gobiernu Central de prohibir el tren de bolos nes 12 primeres milles de costa, pero la desconvocatoria de la fuelga tres de llegase a esti compromisu dixebró en dos bandos a los pescadores asturianos, que nun concueyaben toos cola propuesta del Ministeriu.

L'asuntu tampoco nun terminó ehí, y un recursu de los armadores gallegos que gastaben tren de bolos encabezaos pol patrón mayor de la Cofradía d'A Coruña Torcuato Teixeira llevó a l'Audiencia nacional a echar p'atrás la orde ministerial ateniéndose a un tracamundiu llegal del Ministeriu, que nun diera parte de la orde de prohibición del tren de bolos al Conseyu de Pesca de la UE, colo qu'esta invalidábase automáticamente. De los resultaos del estudiu que va facese d'equí al sábadu van poder sacase conclusiones importantes pal posible desanicie definitivu del tren de bolos