Científicos alemanes van secuenciar el ADN de los restos del Sidrón

La última campaña d'escavaciones na cueva de Borines apurrió menos restos qu'otres anteriores, pero de más calidá, ente ellos un cráneu cásique enteru y dellos güesos llargos d'homínidos que vivieron nel llugar va cerca de 43.000 años, anque la datación definitiva va facela l'Institutu Max Planck de Leipzig, encargáu tamién de secuenciar el ADN nuclear de los restos, que correspuenden a un neñu, dos mozos y dos adultos de neanderthal, que convivieron nel mesmu tiempu y espaciu cola nuestra especie, l'homo sapiens, n'Asturies paleolítica. Lo que se sabe hasta agora del ADN mitocondrial de los homínidos del Sidrón, qu'estrayeren científicos catalanes l'añu pasáu, descarta que se cruzaren con sapiens. Lo que sí se sabe d'ellos acordies col desarrollu de les investigaciones que tan faciendo los profesores Marco de la Rasilla y Javier Fortea ye que los cinco homínidos que s'alcontraron esti añu llegaron a la cueva con violencia, y ello ye qu'en dellos güesos apaecen marques de cortes qu'evidencien que-yos arrancaron la carne, lo qu'abre la puerta a un posible fenómenu de canibalismu.

La Cueva del Sidrón, que s'atopare casualmente nel añu 1994 y que se pensó de mano que los restos que guardaba yeren de la Guerra Civil, ye anguaño ún de los epicentros de la investigación sobre neanderthales n'Europa. Nel añu 2006, la Conseyería de Cultura va facer ellí un centru d'interpretación con instalaciones tamién pa los investigadores. El conveniu per importe de 305.786 euros col que tan financiándose les escavaciones podría enanchase a más años, en cuantes que'l yacimientu paez lloñe d'escosar.