Caudal y UP Langreo preparen la ida de la segunda ronda pol ascensu a Segunda B

Dambos xueguen fuera de casa: los mierenses en Cayón y los llangreanos n'Haro.

El verdugu na segunda ronda del Condal l'añu pasáu, el Cayón, torna a cruzase nel camín del campeón asturianu (1-4 nel global). L'añu pasáu l'equipu cántabru perdió l'ascensu contra'l Portugalete (0-3) y esti añu torna a intentalo tres finar cuatru tres el Laredo, la Gimnástica y el Racing B. La ida va disputase'l sábadu, a les 18 hores, choque nel que los d'Iván Ania,vista la esperiencia del Condal l'añu pasáu y el precedente del Caudal en Boiro, nun han de salir confiaos. Pa ello van contar col sofitu de l'afición, que se va desplazar en masa a Cayón.

Pela so parte, l'Unión torna a alcontrase con un vieyu rival nuna mesma ronda: l'Haro, tercer clasificáu del so grupu. Hai dos años, nel anterior ascensu azulgrana, l'equipu rioxanu tocaba nel bombu y los d'aquella entrenaos por Pablo Lago consiguíen superalu (1-2), dalgo que nun consiguiría'l téunicu d'A Veiga nel 2015 col Caudal (0-0, penaltis). Un rival, poro, clásicu d'estes eliminatories que los d'Hernán Pérez Cuesta van querer superar pese a l'ausencia presumible de Michu, espulsáu contra' CD Alcalá. A la espera del resultáu del recursu, los llangreanos preparen el choque d'ida, que va xugase'l domingu, a les 18 hores, con entraes a 12 euros, adultos; 3, xuveniles (de 13 a 17 años); y de baldre pa la reciella.