El Condal nun pudo superar al Cayón

La falta d'ascensos a Segunda División B arrastra al Andés a preferente.

Finó'l suañu del Condal nel meyor añu de la so historia. Tres quedar campeón de Tercera y nun poder col Rayo Majadahonda na eliminatoria pol ascensu, cayó na repesca col cuartu clasificáu del grupu cántabru, el Club Deportivo Cayón.

El Condal salió pol partíu pa remontar el 1-0 en contra que traxo de Sarón, pero nun pudo abrir la llata nos 45 minutos primeros. Na reanudación, a los dos minutos, los cántabros adelantáronse con gol de Diego, poniendo la eliminatoria cuesta arriba. Marcos algamó'l segundu pa los visitantes y Rueda, de penalti, recortó diferencies, pa poner depués el 1-3 definitivu Briz. El global definitivu de la eliminatoria foi de 1-4 pal Cayón, resultáu que condena al Andés a preferente énte la falta d'ascensos y los descensos del Marino y del Llangréu.