Castañón: “Pola democracia y pol feminismu, sí, prometo”

|
Sofía Fernández Castañón

La diputada de Xuníes Podemos por Asturies, Sofía Fernández Castañón, tornó a prometer el cargu n’asturianu na sesión constitutiva de les Cortes. “Pola democracia y pol feminismu, sí, prometo” foi la forma qu’emplegó la xixonesa nesta ocasión, siendo l’únicu representante del pueblu asturianu n’usar la llingua del país.

Ayeri entamó la decimocuarta llexislatura de la Democracia nel Estáu cola sesión constitutiva del Congresu y el Senáu, que van presidir les socialistes Meritxell Batet y Pilar Llop, de manera respeutiva. Tolos cargos eleutos por Asturies tomaron posesión del mesmu, pa lo qu’emplegaron diferentes formes, anque namái una diputada, Castañón, emplegó la llingua asturiana.

“Pola democracia y pol feminismu, sí, prometo”, espresó la escritora cuando foi requerida pola presidenta. “Poles nueses güeles y los nuesos fíos. Por Asturies y la so xente. Pola llibertá y los drechos sociales. Con tola responsabilidá, güei prometí’l cargu de diputada na #XIVLegislatura”, apuntó darréu na rede social Twitter.

Castañón ocupa ún de los sietes escaños que-y correspuenden anguaño al país nel Congresu. El restu de representantes eleutos son Adriana Lastra, María Luisa Carcedo y Roberto García Morís, pol PSOE; Paloma Gázquez, pol PP; y José María Figaredo, por VOX.

Nel Senáu, mentes, los cuatro políticos escoyíos por Asturies son Francisco Antonio Blanco, María Fernández Álvarez y Fernando Lastra, pol PSOE, y Mercedes Fernández, pol PP. A ellos hai que sumar les nomaes recién María Jesús Álvarez González y María Mercedes Otero, del PSOE, nesti casu por designación de la Xunta Xeneral.

Contador Estadistiques