Batet repite como presidenta d'un Congresu nel que VOX entra na Mesa

Esti martes constituyóse’l Congresu y el Senáu a la espera de la evolución de les negociaciones pa la investidura y formación del Gobiernu. Meritxell Batet repite como presidenta de la Cámara Baxa, onde la izquierda controla una Mesa onde entra la ultraderecha, mentes que na Alta ocupa’l cargu Pilar Llop.

Tuvo que ser a la segunda, depués de que nun Batet algamara la mayoría absoluta nuna votación na que tamién se presentara Ana Pastor, del PP, y Macarena Olono, de VOX. La catalana sumaría 167 sofitos, por 91 y 52 de les sos dos rivales, pa, na definitiva, algamar 166 por 140 de la popular.

Nes votaciones de formación de la Mesa del Congresu, la izquierda consiguió sumar mayoría: 6 de los 9 puestos, 3 pal PSOE y 3 pa Xuníes Podemos. La intención socialista de dexar fuera a VOX de la mesa nun salió alantre pol posicionamientu del PP, que pidía una vicepresendencia primera, polo que l’ultraderechista Ignacio Gil Lázaro var se vicepresidente cuartu.

El PP fíxose con 2 puestos, mentes que Ciudadanos queda fuera.

Segunda muyer presidenta del Senáu

Na Cámara Alta resultó escoyida como presidenta la candidata socialista Llop, tamién na segunda votación, na que s’enfrentó al popular Pío García Escudero, por 130 a 109. Na primera VOX presentara a José Manuel Marín.

La madrilana nun ye militante del PSOE pola so condición de xueza y algamó’l cargu de senadora por designación de l’Asamblea de Madrid. Col so nomamientu conviértese na segunda muyer en presidir el Senáu tres la popular Esperanza Aguirre.