Carthy, primer ciclista británicu en ganar la 'Vuelta a Asturias'

|

El corredor del Caja Rural-Seguros RGA venció nel Altu L'Acebu'l sábadu y caltuvo'l maillot de líder nes dos xornaes restantes de la ronda.

Hugh Carthy, de 21 años, que vive la so segunda temporada nel conxuntu con sede n'Iruña, confirmóse como una promesa del ciclismu tres ganar nel esixente Altu L'Acebu y llevar la LIX 'Vuelta a Asturias' Julio Álvarez 'Mendo', qu'esti añu contó con trés etapes. Trátase del segundu trunfu profesional del británicu –el primeru de dicha nacionalidá en poner el so nome nel palmarés de la ronda asturiana–, tres terminar primeru'l Tour de Korea del 2014.

El Caja Rural-Seguros RGA ganó al favoritu Movistar la partida en la Vuelta, siendo los primeros n'atacar en L'Acebu. Una escapada conxunta a falta de trés quilómetros de Carthy y Sergio Pardilla resultó definitiva na etapa y na carrera, siendo superior el británicu, que sacó en llinia de meta 22 segundos al so compañeru. El terceru foi Garikoitz Bravo (Euskadi Basque Country-Murias), a 28 segundos.

Nuño, asturianu más destacáu

Carlos Alberto Betancur (Movistar) consiguiría la victoria na segunda etapa, ente Cangas del Narcea y La Pola Ḷḷena, mentes que la tercera y cabera foi pal so compañeru Dani Moreno, trunfu que permitió al madrilanu xubir al podiu como tercer clasificáu, a 53 segundos, tres Carthy y Pardilla. Amás, Moreno llevó la clasificación de la Regularidá.

Nel restu de clasificaciones el trunfu foi pal Caja Rural-Seguros RGA, por equipos, y pa Dmitri Sokolov (Lokosphinx), en sprints especiales, siendo'l primer asturianu Israel Nuño. El ciclista del equipu dominicanu Inteja-MMR DCT finó nel puestu 38, a 11 minutos y un segundu del líder.

 

 

Contador Estadistiques