Bloque-UNA-LV-GV defende una política de tresporte públicu qu’ayude a xenerar emplegu

Rafael Palacios defendió en La Pola Siero una política de tresporte púublicu sostenible qu’ayude a xenerar emplegu nel país. El candidatu de Bloque-UNA-LV-GV Rafael Palacios tuvo nel Mercáu polesu repartiendo propaganda de la coalición.
 
La creación d’una política de tresporte públicu sostenible que meyore la conexón interna, vertebre’l territoriu y reduza la contaminación ye ún de los oxetivos de la candidatura nacionalista y verde. Palaciós insistió na necesidá de facilitar la movilidá interna y, con ello, la empleabilidá nel país. D’esta manera, los ciudadanos podríen trabayar nuna zona d’Asturies y residir n’otra, lo que "permitiría evitar en parte’l despoblamientu de les zones menos dinámicas económicamente". Palacios tamién instó a "abandonar el faraonismu d’infraestructures ensin sentíu que tien como guía única una visión desarrollista desfasada que nun tiene en cuenta criterios modernos como la sostenibilidá" y que "namái sirven pa facilitar la salida" de los asturianos.
 
No que respeuta a Siero, afirmó que’l conceyu debería de disponer d’un  plan de tresporte públicu, obligatoriu por tener más de 50.000 habitantes. Coles mesmes, consideró que’l conceyu tendría qu’esixir el cumplimientu "inmediatu" de los compromisos de Feve pa llograr una conexón direuta con Xixón. Tamién apostó por un serviciu que comunique La Pola con Llanera "de forma efeutiva". Otra manera, el númberu ún de la llista del Bloque por Asturies-Unidá Nacionalista Asturiana-Los Verdes-Grupo Verde (Bloque-UNA-LV-GV) señaló qu’esixirá "una rexeneración política nel conceyu" qu’acabe col "espectáculo chornozu de la llexislatura pasada y presente, onde los ciudadanos ven como los políticos sólo van al Plenu a discutir de los sos intereses particulares y partidistes, marxinando toles necesidaes de la ciudadanía".