Bimenes convoca'l so concursu de gaita

El Concursu de Gaita de Bimenes va vivir una edición nueva pese al retrasu na so convocatoria. Va celebrase n'avientu.

Destináu a gaiteros y gaiteres menores de 21 años –a fecha de 30 de payares–, ésti solía celebrase en branu coincidiendo cola Fiesta de la Oficialidá de la Llingua Asturiana. Esta edición, la decimosétima, retrásase por contra a avientu, mes nel que va celebrase la semifinal y la final.

Los músicos interesaos en participar han d'aportar per corréu postal los so datos personales nuna fueya (nome y apellíos, direición, corréu electrónicu y teléfonu) xunto cola fotocopia del DNI enantes del meudía del miércoles 30 a la direición siguiente: Ayuntamientu de Bimenes / XVII Concursu de Gaita de Bimenes / Martimporra 33257 / Bimenes. Nel casu d’haber más de 15 inscritos, tendría llugar una semifinal el 3 d'avientu a les 11 hores na Casa Cultura pa escoyer a los músicos merecedores de participar na final del 10 d'avientu (17 hores), na qu'han d’interpretar un tema llibre y otru a escoyer de la llista siguiente: Muñeira de Remis, Muñeira Lliberdón, Floréu de Remis, Alborada’l paxarín, Diana floriada de Veriña, Xota l’Oriente, Fandangu puntiáu, Carretera d’Avilés, Muñeira Barganaz, Saltón o Xota’l Centru. Na semifinal la pieza a interpretar ye llibre.

El ganador del concursu va llevar 200 euros, mentes que’l segundu va recibir 100 y el terceru, 75. Los trés van ganar tamién un troféu.

La llista de participantes va facese pública’l 1 d'avientu nun actu na Casa Conceyu nel que tamién va sortiaese l’orde d’actuación. Pa participar ye imprescindible utilizar una gaita tradicional asturiana –un solo roncón– y, nel casu de la final, vistir col traxe del país. Pa recibir más información sobre esti certame, los interesaos pueden llamar al númberu de teléfonu 985.700.004.