Bilbao acoyó la robla de constitución de la coalición Agora Repúbliques

|
Constitución Agora Repúbliques

De cara a les Europees del 26 de mayu.

Un hotel bilbaín sirvió esti sábadu de sede pa la robla del documentu de constitución de la coalición Agora Repúbliques, participada por Andecha Astur, EH Bildu, Bloque Nacionalista Galego (BNG), Puyalón de Cuchas, Ahora Canarias y Esquerra Republicana de Catalunya (ERC). Paulo Arboleya, secretaríu xeneral de la formación nacionalista asturiana, foi l'encargáu de poner la firma xunto cola númberu 2 de la llista, la catalana Diana Riba; el 3, el vascu Josu Juaristi; la 4, la gallega Ana María Miranda; y los representantes del partíu aragonés, Dani Lerín, y canariu Vicente Miranda, cola ausencia del cabeza de llista, el catalán Oriol Junqueras, na cárcel de manera preventiva pol 'procés'.

Esta coalición ye la continuidá de Los Pueblos Deciden, con un representante nel Parllamentu Européu, a la que se suma ERC, que nel 2014 presentóse con Esquerra pel Dret a Decidir, algamando dos eurodiputaos. Nel actu de Bilbao los firmantes espublizaron un documentu que resume los compromisos d'Agora Repúbliques "pola democracia, los derechos y les llibertaes".

El mesmu afita la defensa de los derechos sociales y llaborales, la solidaridá, el feminismu, l'ecoloxismu, l'internacionalismu, y la cultura y les llingües de los pueblos, amás de combatir el fascismu y la xenofobia.

Contador Estadistiques