Barbón recibe l'alta y aísllase en Presidencia

El presidente ingresó nel HUCA'l vienres depués de sentise mal al contaxase cola variante ómicron del coronavirus SARS-CoV-2.

Adrián Barbón recibió l'alta cuasi 72 hores depués y permanez aislláu nel apartamentu de Presidencia mientres recupera de la COVID-19. El llavianés diera positivu na mañana del vienres nun test d'antíxenos previu al 33 Congresu de la Federación Socialista Asturiana (FSA), que finalmente s'aplazó al haber otros dos más, y anque nun primer momentu namái contaba con tos, tuvo que quedar nel hospital uvieín.

El contar cola dosis completa de la vacuna fixo que nun se complicara l'estáu del presidente del país, que recordó la importancia del preparáu contra'l coronavirus pa evitar una enfermedá grave, la necesidá de protexese con mázcares de calidá y la estancia en zones d'interior bien ventilaes, al tiempu qu'agradeció'l tratu y profesionalidá del personal sanitariu. El vicepresidente Juan Cofiño va ser presidente en funciones hasta la vuelta de Barbón y va participar el miércoles na Conferencia de Presidentes telématica convocada por Pedro Sánchez énte l'empeoramientu de la situación sanitaria cola intención de consensuar actuaciones.

Na imaxe, Barbón acudiendo a un aconceyamientu del Conseyu de Gobiernu'l mes pasáu, con Cofiño sentáu na mesa. Semeya obra d'Armando Álvarez.