Barbón da positivu nun test d'antíxenos previu al 33 Congresu de la FSA

El presidente tenía dalgo de tos y taba aislláu en Presidencia a la espera d'un PCR, pero al empeorar el so estáu quedó ingresáu nel HUCA.

Adrián Barbón comunicó que dio positivu nun test d'antíxenos. La Federación Socialista Asturiana (FSA) decidió facer esta prueba al mediu millar de participantes nel 33 Congresu que se va celebrar esta tarde y mañana nel Palaciu d'Esposiciones y Congresos d'Uviéu pa garantizar la so seguridá nun momentu d'alta tresmisión del coronavirus SARS-CoV-2.

El llavianés confirmó que ta bien, con dalgo de tos y ensin nengún otru síntoma. Nes próximes hores va facer una PCR pa confirmar el positivu.

'Asturias con futuro'

La FSA entama esti congresu baxo'l lema 'Asturias con futuro', nel que Barbón va salir proclamáu como secretariu xeneral del partíu. Nel mesmu va abrise un espaciu d'análisis y alderique del que surdirán les propuestes de los socialistes pal país pa los años próximos.

Pedro Sánchez, secretariu xeneral del PSOE y presidente del Gobiernu del Estáu, anunciara la so presencia n'Uviéu, asina como la vicesecretaria xeneral, la rioseyana Adriana Lastra.

ACTUALIZACIÓN: pol empeoramientu del so estáu, y prescripción médica, Barbón quedó ingresáu de tarde nel HUCA. Mentes, la FSA aplaza'l so 33 Congresu "énte una situación esceicional". De los 588 test d'antíxenos fechos a los participantes, rexistráronse 3 positivos.

Na semeya, Barbón el martes depués del aconceyamientu de la Comisión Executiva Autonómica.