Bada sufre'l robu d'instrumentos nel so llar

L'aición delictiva desendolcóse'l sábadu, a plena lluz del día, aprovechando l'ausencia del músicu del so domiciliu de Carreño.

Según la información apurrida por Rubén Bada en redes sociales, onde solicita a luthiers y aficionaos sofitu pa siguir el rastru de los instrumentos musicales, que podríen finar nel mercáu de segunda mano, el motín del robu ta compuestu por delles guitarres (una Gibson Flying V granate, una Maison 335 collorada, una acústica Guild Jumbo, una Fender Telecaster blanca y una clásica), una viola Divertimento de 15,5 pulgaes y un arcu de viola Coda Bow Prodigy de fibra de carbonu, una pandereta asturiana de 30 centímentos con ruxideres doraes, una pandereta de 38 centímetros, un panderu cuadráu vistíu de flecos colloraos y blancos, y unes castañueles, amás de dos televisores. Dalgunos d'ellos nun yeren propiedá de Bada, lo qu'aumenta'l disgustu del artista.

Esti casu recuerda'l que vivió Elías García nel 2015, que consiguió recuperar dalgunos de los instrumentos robaos cinco meses depués gracies a una investigación policial. Bada, amás de luthier, ye un músicu mui conocíu dientro y fuera d'Asturies n'ámbitos folk, formando parte nel pasáu de grupos comos N'Arba, Xéliba, Corquiéu y Dixebra, y siendo componente anguaño de L-R, Aú?, Alce y Navaya, Alfredo González y Midnight Special, amás de collaborar cola Banda de Gaitas El Trasno.