Asturies vive un San Xuan marcáu poles restricciones

El fueu nun va faltar esti San Xuan, la nueche más máxica del añu, anque la celebración va ser diferente a la de los años últimos. Les restricciones por cuenta la crisis sanitaria pola pandemia de COVID-19 va arrequexar les fogueres a celebraciones familiares, lloñe de les entamaes por conceyos y vecinos qu’axuntaben grandes cantidaes de xente, mentes que se potencia l'enrame de fontes.

Mieres, que ta celebrando les sos fiestes baxo’l nome de ‘Esto nun ye San Xuan’, nun entama la so foguera, al igual que Xixón, Tresona o Uviéu. La villa de Xovellanos, sicasí, aumenta l’engalanamientu de fontes, enantes centrada na de Pelayo y agora treslladada a zones d’agua de tol conceyu.

A les 20 hores Andecha de Cultura Tradicional Na Señardá va tar y baillar na plaza’l Marqués, mentes qu’otros grupos de baille tradicional van engalanar les de Laviada (Grupo Folklórico El Xolgoriu), Llantones (Música y Baile Tradicional Excelsior), El Polígono (Coros y Danzas Flor de Xaranzaina), Begoña (Asociación de Coros y Danzas Jovellanos), Deva (Grupo Folklórico Xiringüelu) y Trubia (Grupo Folklórico El Turruxón), y n’otres asitiaes nes places del 17 d’agostu (Agrupación Folclórica Asturiana Los Xustos) y de la Fábrica del Gas (Grupo Folklórico Trebeyu), y na cai Munuza (Grupo de Folclore La Alegría). Y ye que l'agua, xunto al fueu, ye un elementu protagonista na nueche de San Xuan.

Esti festexu del solsticiu –realmente foi nel pasu del día 20 al 21, pero la Ilesia católica treslladó esta celebración pagana pa coincidir con San Xuan Bautista– recibía’l nome d’Alban Heruin. Nella faise cultu al sol col prendíu de fogueres y al agua al traviés del engalanamientu de fontes, y en delles zones, como Asturies, ta entovía mui vivu.

Amás ye l’únicu momentu d’atopar la flor d’agua, que surde per un instante colos primeros rayos de sol de la mañana según la lleenda, trayendo amor, belleza y salú al que da con ella. Tamién ye la nueche na que les xanes salen de les sos cueves, siendo posible veles nes fontes.

Dada la situación pola pandemia, esti añu la quema de fogures va queda pa celebraciones familiares o de grupos pequeños d’amigos. Mentes, son munches les fontes que yá se pueden ver engalanaes en to país.

Especiales ‘A la gueta los suaños’

Coincidiendo con esta xornada, ponemos a disposición de los nuesos llectores el reportaxe sobre San Xuan pa neños y neñes de la nuesa seición infantil ‘A la gueta los suaños’ con refranes sobre esta fecha máxica. Ésti ayudará a los más pequeños de la casa a comprender meyor les razones d'esta celebración tan prestosa.

Tamién van poder disfrutar del cuentu animáu 'L'encantamientu' que se desendolca en San Xuan.