Asturies supera'l centenar de contaxos

Detectáronse 102 casos esti miércoles.

La Conseyería de Salú confirmó más d'un centenar de casos positivos por COVID na xornada d'ayeri. Los 102 afeutaos, a esceición de 3 que foron hospitalizaos, son asintomáticos o presenten síntomes leves de la enfermedá provocada pol coronavirus SARS-CoV-2, y tán aisllaos nos sos llares.

Amás, 4 persones diganosticaes en díes anteriores ingresaron ayeri nel hospital. Anguaño hai na UCI 13 persones, les mesmes que'l martes, y 39 en planta, 2 más, con 5 curaciones que ponen el total d'altes epidemiolóxiques en 2.222.

El Serviciu de Salú del Principáu d'Asturies (SESPA) fixo ayeri 3.640 pruebes PCR, polo que la tasa de positividá queda nel 2,74 por cientu, perbaxo del 5 por cientu que marca la Organización Mundial de la Salú (OMS) pa tener controlada la pandemia. La media nacional d'incidencia acumulada de COVID-19 na selmana última ye de 58,4 por 100.000 habitantes, cifra que se supera ocho veces más en Llaviana y el doble en Samartín del Rei Aurelio y Llangréu, los trés conceyos que tán anguaño n'alerta naranxa.