Asturies recibe 66.820 dosis esta selmana

61.420 vacunes de COVID-19 lleguen esti llunes, mentes qu'otres 5.400 tán previstes pal xueves. La media de contaxos diarios baxo de 126 a 115.

Esta mañana aportaron a Asturies 53.820 dosis de la vacuna Comirnaty, de Pfizer/BioNTech, y 2.200 de Vaxzevria, d'Astrazeneca/Oxford, mentes que tán en camín otres 5.400 de Moderna, que llegarán esta tarde. La segunda tanda de Janssen, con 5.400, tán confirmaes pal xueves, polo que'l Serviciu de Salú del Principáu d'Asturies (SESPA) va disponer esta selmana d'un total de 66.820 p'avanzar esta selmana cola campaña de vacunación.

La evolución de la pandemia sigue nun estáu de meseta, con una incidencia acumulada a 14 díes moviéndose ente los 158 y los 175 casos de COVID-19 por cada 100.000 habitantes dende'l 15 de marzu. El sábadu, a falta de conocer los datos oficiales últimos, yera de 168.

315 positivos esta fin de selmana

La selmana pasada entamó, tres la revisión de les cifres, con 49.540 positivos, mentes qu'ayeri esta cantidá algamaba un total de 50.342 –l'actualización rebaxa esta cifra en 2 casos–. Son 802 contaxos na selmana última, polo que la media diaria quedó en 115.

Esta cantidá supón un descensu cola anterior, cuando foi de 126, y la mesma qu'hai trés. Dende qu'entamó la tercer fola la evolución d'esti datu que vien rexistrando Asturies.com ye'l siguiente: 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126 y 115.

Na fin de selmana rexistráronse 315 casos, cifra superior al anterior, cuando se detectaron 290. El vienres hebo 128, el sábadu 103 y ayeri 84, con tases de positividá diaries del 7,72 por cientu, del 5,71 por cientu y del 5,32 por cientu, de manera respeutiva.

A 7 díes esti porcentaxe yera'l sábadu del 5,7 por cientu –ayeri baxó al 5,54 por cientu–, lo que supón un ascensu dende'l xueves, cuando quedó nel 5,28 por cientu.

Ensin finaos ayeri

Asturies vivió ayeri una xornada ensin finaos cola enfermedá causada pol coronavirus SARS-CoV-2, fechu que nun se producía dende'l día 15, cuando s'acumularon trés díes siguíes ensin muertes. El vienres hebo 1 y el sábadu, 3, que ponen el total del andanciu en 1.944.

Hai hospitalizaos 177 pacientes hospitalizaos en planta con confirmación o sospecha de COVID-19, 18 más que'l xueves. Mentes, na UCI hai ingresaes 63 persones, 6 menos que nesa xornada.

Mieres y Llangréu, abiertos

Llanes queda como únicu conceyu con zarru perimetral depués de que Mieres y Llangréu salieren del riesgu estremu. El de la cuenca d'El Caudal fíxolo'l sábadu, mentes que'l d'El Nalón recuperó la movilidá güei.

Pa consultar los indicadores de tolos territorios y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na semeya, caxes con viales de la vacuna Comirnaty de Pfizer/BioNTech recibíes esta mañana.