126 contaxos diarios de media na selmana última

Supón un aumentu con respeuto a l'anterior.

A falta de la espublización de los datos oficiales de la COVID-19, la Conseyería de Salú comunicó 106 positivos ayeri, la cantidá más alta de la fin de selmana, yá que'l vienres se rexistraron 102 y el sábadu, 83. En total 291 –l'actualización rebáxalo a 290–, cantidá inferior al de la pasada, cuando hebo 323.

Sicasí, la media de contaxos diarios de la selmana foi superior a la de l'anterior, aumentando de 121 a 126. De 48.651 casos pasóse a 49.534 –una revisión báxalo a 49.533–, un total de 883 polos 845 del periodu previu.

Ye la segunda selmana qu'aumenta esti datu, confirmando l'estáu de meseta nel que ta la pandemia tres la tercer fola, con una medra mui llixera que podría sospechar l'entamu de la cuarta, como creen les autoridaes sanitaries. Asina, ésta ye la evolución dende qu'arrancó la tercera: 78, 101, 167, 292, 421, 482, 383, 226, 154, 135, 144, 113, 113, 119, 115, 121 y 126.

La tasa de positividá esta fin de selmana foi del 4,66 por cientu'l vienres, del 5,15 por cientu'l sábadu y del 6,76 por cientu ayeri. A 7 díes, esti porcentaxe'l sábadu yera del 5,69 por cientu –ayeri xubió al 5,77 por cientu–, siguiendo esti indicador tamién un pequeñu ascensu.

7 finaos

Estos trés díes finaron 7 persones cola enfermedá causada pol coronavirus SARS-CoV-2, que ponen el total del andanciu en 1.935 –l'actualización rexistra un fináu non contabilizáu en feches anteriores–. El vienres frayábase la serie de trés xornaes ensin muertes cola noticia de la perda de dos muyeres de 86 y 75 años, pa siguir con 4 el sábadu y 1 ayeri.

Hai hospitalizaos 172 pacientes con confirmación o sospecha de COVID-19, a los qu'hai que sumar 73 que tán na UCI. Son 12 y 2 más que'l xueves.

Na semeya, dalgunos de los viales de la vacuna Comirnaty de Pfizer/BioNTech llegaos esta mañana a Asturies, un total de 38.610 dosis pa siguir cola campaña de vacunación.