Asturies prepara les fontes y les fogueres pa celebrar San Xuan

Cientes de fogueres van prender n’Asturies na medianueche d'esti sábadu pa celebrar San Xuan. La nueche más máxica del añu, na que'l fueu y l'agua son protagonistes, ye esperada por toles asturianes y asturianos, que yá engalanen les fontes.

La mayoría de ciudaes y pueblos d'Asturies –al igual que munchos barrios– tienen preparaes pa esta nueche fogueres pa celebrar el solsticiu de branu –realmente foi nel pasu del día 20 al 21, pero la Ilesia católica treslladó esta celebración pagana pa coincidir con San Xuan Bautista– y quemar los augurios malos. Esta tradición de raigaños celtes que recibía’l nome d’Alban Heruin y na que se fai cultu al sol y al agua al traviés del engalanamientu de fontes, ta entovía mui viva nel país.

Amás ye l’únicu momentu d’atopar la flor d’agua, que surde per un instante colos primeros rayos de sol de la mañana según la lleenda, trayendo amor, belleza y salú al que da con ella. Tamién ye la nueche na que les xanes salen de les sos cueves, siendo posible veles nes fontes.

Celebraciones per tol país

La foguera más multitudinaria ye la qu’entama’l Conceyu de Xixón na sablera d’El Natahoyo, que per primer vegada nun va contar con conciertu tres la quema a la medianueche. La celebración principia a les 21 hores col enramáu de la fonte de Pelayo por parte d’Andecha de Cultura Tradicional Na Señardá y va siguir na playa coles actuaciones de la Banda Gaites Noega (22.45 hores) y la Banda Gaites Villa de Xixón (23.15 hores).

A la medianueche, tres el prendíu de la foguera, va tener llugar la danza prima y el llanzamientu de fueos artificiales. Otros barrios de la ciudá, como Ciares o Tremañes, tamién celebren esta nueche máxica nun ambiente más vecinal, mientres qu’en Mareo o Cimavilla entámense actuaciones musicales.

Una cita clásica ye de la Corvera, en Tresona, la nomada 'Foguera d'Asturies', que l’añu pasáu estrenó’l títulu de Fiesta d’Interés Turísticu Autonómicu, pero que dende hai unos años dio un xiru y alloñóse un tantu de la tradición al sumar una orquesta o una fiesta de música electrónica. La folixa va principiar a les 21 hores col ‘Foguera’s Dance’ na zona de Les Palmeres, mientres n’Overo va haber actividaes infantiles

La Banda Gaites de Gaites de Corvera d’Asturies va protagonizar un pasucais a les 23 hores y el ritual de la quema de la foguera, a cargu de Nun Trism, va comenzar a les 23.40 hores. Darréu va haber una Nueche Celta con Hevia y un conciertu a la Deva con Tsarigando, pa finar la folixa cola segunda parte de la folixa de música electrónica hasta les 4.

Mieres, mentes, celebra les sos fiestes de San Xuan, y Uviéu entama la foguera otru añu onde la Catedral, con actuaciones d’Héctor Braga y Teatro Margen dende les 22.30 hores. En L'Entregu, el Centru Social Autoxetionáu La Semiente organiza la foguera del pueblu nel prau xunto al campu de fútbol y l’enramáu de fontes pela mañana, que completen los conciertos de Nuberu y los Berronstones, dende les 20.30 hores, y La Tarrancha y los lleoneses La Jari depués de la Danza Prima tres la quema.

Otra manera, Ún de Grao toca en casa con motivu de San Xuan (22 hores na cai Manuel Pedregal, na zona’l Parque d'Abaxu) y Tuenda en Noreña (00.15 hores, prau Los Riegos).

Especiales ‘A la gueta los suaños’

Coincidiendo con esta xornada, ponemos a disposición de los nuesos llectores el reportaxe sobre San Xuan pa neños y neñes de la nuesa seición infantil ‘A la gueta los suaños’ con refranes sobre esta fecha máxica. Ésti ayudará a los más pequeños de la casa a comprender meyor les razones d'esta celebración tan prestosa.

Tamién van poder disfrutar del cuentu animáu 'L'encantamientu' que se desendolca en San Xuan.

Na semeya, una fonte engalanada en Nueva l'añu pasáu.