Asturies nun rexistra positivos per primer vez dende'l 3 de marzu

La Conseyería de Salú nun dio a conocer el númberu de pruebes feches el miércoles.

El 3 de marzu Asturies rexistraba'l segundu positivu por PCR depués de que'l primeru se diera'l 29 de febreru. Dende estós, la cifra de casos nuevos nun paró de medrar día a día hasta ayeri, cuando'l Gobiernu dio la mesma cifra que nel día anterior: 2.356.

Dos meses y mediu depués l'entamu del andanciu de COVID-19 la situación estabilízase nun momentu nel qu'Asturies ta na fase 1 de la desescalada, cola posibilidá de biltos nuevos que s'abre cola fin del desconfinamientu. Sicasí, la bona noticia ta ehí, con 0 casos nuevos por PCR díes depués de l'apertura progresiva.

Un fináu

No que respeuta a los tests d'anticuerpos, deteutáronse 14. Mentes, hai que llamentar un fináu na xornada, que pon el total de perdes en 308.

Na UCI hai un ingresáu menos (24) y en planta, 7 (73). La cifra de persones col alta epidemiolóxica medró en 8, polo que yá hai 1.046 ciudadanos que superaron la COVID-19.